काठमाडौं । पाँच दलीय गठबन्धनले स्थानीय तह निर्वाचनबारे निर्वाचन आयोग र विज्ञहरुसँग छलफल गर्ने भएको छ ।
शुक्रबार बसेको गठबन्धनको बैठकले स्थानीय तह निर्वाचनबारे द्विविधा देखिएको उल्लेख गर्दै त्यसलाई प्रष्ट पार्न निर्वाचन आयोग र संविधानविद्हरुसँग छलफल गर्ने सहमती गरेको हो ।
आयोग र विज्ञहरुसँग छलफल गरी निर्वाचनको मिति तोक्ने सहमति भएको बैठकमा सहभागी राष्ट्रिय जनमोर्चाका उपाध्यक्ष दुर्गा पौडेलले जानकारी दिनुभयो ।
स्थानीय तहको निर्वाचन तीन चरणमा भएकाले कुन मितिलाई आधार मानेर स्थानीय तहको निर्वाचन गराउने भन्ने विषयमा द्विविधा देखिएकाले त्यसको निक्र्यौंल गरेर अघि बढन निर्वाचन आयोग र विज्ञहरुसँग छलफल गरेर अघि बढ्ने सहमती गरिएको पौडेलले बताउनुभयो ।
‘स्थानीय तहको अवधिबारे बेग्लाबेग्लै ब्याख्या भइरहेको छ । त्यसकार निर्वाचन आयोग र विज्ञहरुसँग छलफल गरेर निर्वाचनको मिति घोषणा गर्ने सहमति आजको बैठकमा भएको छ’ पौडेलले भन्नुुभयो, ‘संविधानसम्मत ढंगले निर्वाचन गराउन प्रधानमन्त्रीलाई दलहरुले सुझाव दिएका छन् ।’
उपाध्यक्ष पौडेलले तीनै तहको निर्वाचन एकैपटक गर्ने विषय पनि छलफलमा आएको बताउनुभयो । खर्चको हिसावले तीनै तहको निर्वाचन एकै पटक गर्दा मितव्ययिता हुन्छ कि भन्ने विषय उठेको तर, त्यसबारे केही निर्णय नभएको पौडेलले बताउनुभयो ।
शनिबार सर्वदलीय बैठक
यसैबीच प्रधानमन्त्री शेरबहादुर देउवाले भोलि (शनिबार) सर्वदलीय बैठक बोलाउनुभएको छ । बिहान ९ बजेका लागि बैठक बोलाइएको प्रधानमन्त्रीका प्रेस विज्ञ गोविन्द परियारले जानकारी दिनुभयो ।
आगामी निर्वाचनलगायतका बिषयमा छलफल गर्न बैठक बोलाइएको हो । शुक्रबार बसेको पाँच दलीय गठबन्धनको बैठकले तीनै तहको निर्वाचनबारे छलफल गरेको थियो भने प्रधानमन्त्री देउवाले राष्ट्रका नाममा गरेको सम्बोधनमा पनि एक वर्षभित्र तीनै तहको निर्वाचन गर्ने उल्लेख गर्नुभएको थियो।
