बागलुङ । राष्ट्रिय जनमोर्चा जिल्ला समिति, बागलुङले नेपाली कांग्रेसलाई गुण्डागर्दी बन्द गर्न चेतावनी दिएको छ । आफ्नो पार्टीका कार्यकर्ता बागलुङ जिल्ला जैमिनि नगरपालिका–१० राङखानी ओखका लक्ष्मण श्रीसमाथि कांग्रेसका कार्यकर्ताहरुले आक्रमण गरेको भन्दै जनमोर्चाले गुण्डागर्दी बन्द गर्न चेतावनी दिएको हो ।

जिल्ला सचिव भीमलाल पोखरेलले बिहीबार एक विज्ञप्ति जारी गरी मेला हेर्न गएका आफ्ना कार्यकर्तालाई बिनाकारण कांग्रेसले आक्रमण गरी घाइते बनाएको आरोप लगाउनुभएको छ ।

साथै, कांग्रेस नेता रोहित थापाको समूहले लक्ष्मण श्रीसको घरमा पुगी सुतिरहेका लक्ष्मणलाई ज्यान मार्ने उदेश्यले गुण्डागर्दी शैलीमा घरबाट बाहिर निकाली उनी, उनको आमा र भाउजुलाई लछारपछार गर्दै कुटपिट गरेको राजमोले जनाएको छ ।

साथै, राजमोले आफ्ना कार्यकर्तालाई संयम रहन आग्रह गर्दै कांग्रेसले आफ्ना अराजक गतिविधि जारी राखे अर्को जैमिनी काण्ड दोहोरिन सक्ने चेतावनीसमेत जनमोर्चाले दिएको छ ।

विज्ञप्तिमा भनिएको छ, यहि मिति २०७८ माघ १ गते बागलुङ जिल्ला जैमिनी नगरपालिका कुश्मिशेरामा चलिरहेको जैमिनी महोत्सवको सन्दर्भमा नेपाली कांग्रेसका कार्यकर्ताद्धारा घटाइएको घटनाप्रति हाम्रो गम्भीर ध्यानाकर्षण भएको छ ।

माघ १ गते मेला हेरिरहेको बेलामा हाम्रा पार्टीका कार्यकर्ता बागलुङ जिल्ला जैमिनि नगरपालिका वार्ड नं.१० राङखानी ओखले निवासी लक्ष्मण श्रीस माथि नेपाल तरुणदल जैमिनीका अध्यक्ष तथा नेपाली कांग्रेस गण्डकी प्रदेश महाधिवेशन प्रतिनिधी जैमिनी–४, सर्कुवा गाउँका रोहित भनिने लेख बहादुर थापा लगायत नेपाली कांग्रेसका कार्यकर्ताहरुको समूहले कुटपिट गरी गम्भीर घाईते बनाएका थिए ।

घाइते लक्ष्मण श्रीसले आफुलाई साझ ५ः३० बजे आक्रमण भएको प्रहरीलाई जानाकारी गराउदा प्रशासनले वेवास्ता गर्नु खेदजन्य छ । सोही दिन राती पुन आक्रमण गर्न लेख बहादुर थापाको नेतृत्वमा नेपाली कांग्रेसका कार्यकर्ताहरु जैमिनी–५, बिनामारेका ठग बहादुर क्षेत्री र टंक बहादुर विक जैमिनी–४, सर्कुवाका नविन थापा, किरण थापा, अस्मित उचै ठकुरी, अशोक उचै ठकुरी र मनिष शाही जैमिनी–१, कुश्मिशेराका विकास शर्मा र अशोक शर्मा लगायतका अराजक समुहले जैमिनी–१, कुश्मिशेराका गाडी मालिक बालकृष्ण शर्माको ग३ ख५८८८ नम्वरको गाडी लिएर हो–हल्ला गर्दै राङखानी ओखले गाउँमा पुगेर सुतेका मान्छेलाई थर्काउने, ढुङ्गामुढा गर्ने, घरगोठको खर च्यातेर आगो बाल्ने जस्ता अराजक गतिबिधी गर्दै लक्ष्मण श्रीसको घरमा पुगी सुतिरहेका लक्ष्मणलाई ज्यान मार्ने उदेश्यले गुण्डागर्दी शैलीमा घरबाट बाहिर निकाली उनी, उनको आमा र भाउजुलाई लछारपछार गर्दै कुटपिट गरेका थिए ।

घटनाको छलफल गर्न माघ ५ गते जिल्ला प्रहरी कार्यालय बागलुङको निर्देशनमा कुश्मिशेरा प्रहरी चौकीमा बोलाएको थियो तर उनीहरु छलफलमा जानुको सट्टा जैमिनीका विभिन्न वडाहरुमा गएर राष्ट्रिय जनमोर्चाका कार्यकर्ताहरुको नामथर हुलिया सोध्दै आतंकित पार्ने काम गरिरहेका छन् ।

यो गतिबिधीले सत्ताको आडमा घटाईएको २०४८ को जैमिनीघाट काण्ड पुनाराबृत्ति हुने सम्भावनालाई नकार्न सकिदैन । घटनाको सन्दर्भमा नेपाली कांग्रेस जिल्ला नेतृत्वसंग सम्वाद तथा छलफल गर्दा यो बिषयलाई राजनैतिक रंग नदिने कुराको सहमति भएपनि मेलामा घटना घटाउने, गाउँमा आतंक मच्चाउने समुहलाई संरक्षण गर्दै नेपाली कांग्रेस बागलुङले घटनालाई राजनितीकरण गरी आफ्नो धारणा सार्वजनिक गरेको छ ।

हामीले मेला हेर्ने सन्दर्भमा र राती सुतेको बेला गुण्डागर्दी शैलीमा घटाइएको घटनाप्रति खेद प्रकट गर्दै भत्सना गर्दछौं साथै घटनामा संग्लग्न अपराधी ब्यक्तिहरुलाई अविलम्व कानुनी दायरामा ल्याउन र जनतालाई शान्ति सुरक्षा दिलाउन प्रशासन समक्ष माग गर्दछौं । यस घटनालाई अतिरञ्जीत गरी पुर्वाग्रहको राजनिती गर्दा उत्पन्न हुने परिथितीको जिम्मेवार सम्बन्धित पक्ष हुनु पर्ने छ । त्यसैले संयमित हुन सबैमा अनुरोध गर्दछौँ ।