डी.आर. बन्जाडे, बुटवल ।
राष्ट्रिय जनमोर्चाको तर्फबाट राष्ट्रिय सभा सदस्यका उम्मेदवार तुलबहादुर विश्वकर्मा (राजेश विक) ले सामाजिक विभेद अन्त्यका लागि पहल गर्न आफ्नो उम्मेदवारी रहेको बताउनुभएको छ ।
सोमबार पाँच दलीय गठबन्धनले लुम्बिनी प्रदेशको बुटवलमा आयोजना गरेको पत्रकार सम्मेलनमा नेता विकले आफूले राजनीति मार्फत समाजमा रहेका विभेदको अन्त्य र सामाजिक न्याय स्थापित गर्न लागि परेको बताउँदै आफ्नो उम्मेद्वारी त्यसैका लागि भएको बताउनुभयो ।
लुम्बिनी प्रदेशमा माघ १२ गते हुने राष्ट्रियसभा निर्वाचनमा पाँच दलीय गठबन्धनका उम्मेद्वारले आफूहरुको जित निश्चित भएको दाबी गरेका छन् । लोकतन्त्र, संविधानको रक्षा, राजनीतिक स्थीरताका लागि कानुनी र संवैधानिक रक्षाका लागि गठबन्धन बनेको बताउँदै राष्ट्रियसभामा गठबन्धनका उम्मेद्वारले अंकगणितका हिसाबले पनि सहजै जित निकाल्ने उम्मेदवारहरुको भनाई छ ।
राष्ट्रिय सभाको निर्वाचनमा गठबन्धनबाट राष्ट्रिय जनमोर्चाबाट तुल प्रसाद विश्वकर्मा राजेश, बाँकेका नेपाली कांग्रेसका युवराज शर्मा, पाल्पाबाट नेकपा एकिकृत समाजवादीका राजेन्द्र लक्ष्मी गैरे र चुनावी मैदानमा उत्रेका छन्।
पत्रकार सम्मेलनमा गठबन्धनका तर्फबाट उम्मेद्वार बनेका तीनै जनाले आफूहरुले जनताको पक्षमा काम गर्ने प्रतिबद्धता जनाए । तीनै जना उम्मेद्वारले गठबन्धनका सबै दलमा रहेकाहरुबाट मत पाउने आशा राखे ।
सो अवसरमा नेकपा एकीकृत समाजवादीका लुम्बिनी प्रदेश अध्यक्ष मेटमणी चौधरीले आफूहरुसँग एक हजार भन्दा बढी मत अन्तर रहेकाले सजिलै जित्ने बताउनुभयो । उहाँले १५ सय मतअन्तरले जित्ने दाबी गर्दै एमालेको असन्तुष्ट भोट समेत आफूहरुले तान्ने बताउनुभयो ।
पत्रकार सम्मेलनमा गठबन्धनका तर्फबाट राष्ट्रिय जनमोर्चाका अध्यक्ष बोमबहादुर खत्री, कांग्रेस लुम्बिनीका अध्यक्ष अमरसिंह पुन, नेकपा माओवादी केन्द्रका नेता सुदर्शन बराल, नेकपा एकीकृत समाजवादी लुम्बिनीका अध्यक्ष मेटमणि चौधरी, जनता समाजवादी पार्टी नेपाल लुम्बिनीका अध्यक्ष अशोक कुमार यादवले प्रेस विज्ञप्ति मार्फत प्रदेशसभा सदस्य, पालिकाका प्रमुख उपप्रमुखहरुलाई मत दिएर गठबन्धनलाई जिताउन अपिल गर्नुभएको छ ।
लुम्बिनीमा रिक्त ३ पदका लागि माघ १२ गते दाङमा निर्वाचन हुनेछ । यहाँ प्रदेशसभाका ८१ र पालिकाका प्रमुख उपप्रमुख २१५ जना गरि २ सय ९६ जना कुल मतदाता छन । यसमध्ये लुम्बिनीमा गठबन्धनको कुल मतभार ४ हजार २ सय ९० देखिन्छ भने एमालेको कुल मतभार ३ हजार ३ सय १२ मतभार देखिन्छ ।
यसैबीच पाँच दलीय गठबन्धनका उम्मेदवारहरुले चुनावी प्रचार र भेटघाट शुरु गरेका छन । बुटवलमा पत्रकार सम्मेलन गरेर गठबन्धनका उम्मेद्वारहरुले जिल्ला भ्रमण र भेटघाटको कार्यक्रम समेत सार्वजनिक गरेको छ ।
सोमबार बुुटवलमा पत्रकार सम्मेलन गरेर टोली पाल्पा पुगेको छ । मंगलबार गुल्मीको तम्घास, अर्घाखाँचीमा भेटघाट गर्ने कार्यतालिका गठबन्धनले बनाएको छ । त्यस्तै माघ ५ गते रोल्पा, ६ गते दाङको घोराही, ६ र ७ गते बर्दिया, ७ गते बाँके, ७ गते नै दाङको भालुवाङ, ८ गते कपिलवस्तुको चन्द्रौटा, रुपन्देहीको बुटवल र ९ गते नवलपरासीमा भेटघाट तथा चुनावी प्रचार कार्यक्रम राखिएको गठबन्धनले जनाएको छ ।
