काठमाडौं । गत शुक्रबार भएको सर्वदलीय बैठकमा सहभागी राष्ट्रिय जनमोर्चाका नेताहरु उपाध्यक्ष दुर्गा पौडेल र सचिव हिमलाल पुरी आइसोलेसनमा बस्नुभएको छ । माओवादी केन्द्रका अध्यक्ष पुष्पकमल दाहाल प्रचण्डलाई कोरोना संक्रमण पुष्टि भएपछि पौडेल र पुरी आइसोलेसनमा बस्नुभएको हो ।
उपाध्यक्ष पौडेलको पीसीआर रिपोर्ट भने नेगेटिभ आएको तैपनि संक्रमण भएको हुनसक्ने आशंकाका कारण अरुलाई संक्रमण नहोस् भनेर आफूलाई आइसोलेट गरेको पौडेलले बताउनुभयो ।
‘मेरो पीसीआर रिपोर्ट नेगेटिभ आएको छ । तैपनि म अहिले आइसोलेसनमा छु’ पौडेलले भन्नुभयो, ‘संक्रमण तत्काल नदेखिएको अवस्था पनि हुन सक्छ भन्ने आशंकाका साथ सजगता अपनाएको हुँ ।’
माओवादी केन्द्रका अध्यक्ष प्रचण्डलाई शनिबार कोरोना संक्रमण पुष्टि भएको थियो । प्रचण्ड सहभागी पाँच दलीय गठबन्धन समन्वय समितिको बैठकमा उहाँहरु सहभागी हुनुहुन्थ्यो ।
यस्तै, सो बैठकमा सहभागी अधिकांश नेताहरु अहिले आइसोलेसनमा बसेका छन् । प्रधानमन्त्रीसमेत रहेका नेपाली कांग्रेसका सभापति शेरबहादुर देउवासहित नेपाली कांग्रेसका चार जना नेताहरु पनि आइसोलेसनमा बसेका छन्।
सभापति देउवा, उपसभापति पूर्णबहादुर खड्का, नेताद्वय रामचन्द्र पौडेल र ज्ञानेन्द्रबहादुर कार्की आइसोलेसनमा बसेका हुन् । यद्यपी सञ्चारमन्त्री खड्काको पीसीआर रिपोर्ट भने नेगेटिभ आएको छ ।
गएको बिहीबार र शुक्रबार सत्ता गठबन्धनको बैठक बसेको थियो । त्यसअघि भएको माओवादीको महाधिवेशनका क्रममा प्रचण्डलगायत अधिकांश शिर्ष नेतालाई संक्रमण भएको बताइएको छ । प्रचण्ड सर्वदलीय बैठकमा सहभागी हुनुभएको थियो ।
यसैबीच राजमो उपाध्यक्ष एवम् प्रवक्ता पौडेलले आगामी निर्वाचनमा गठबन्धनले भागबण्डा गरेको भनेर केही सञ्चारमाध्यममा आएको समाचारमा कुनै सत्यता नरहेको स्पष्ट पार्नुभएको छ ।
पाँच दलबीच राष्ट्रिय सभाको निर्वाचनमा मिलेर जाने सहमति भएपनि त्यसपछिका निर्वाचनबारे अहिलेसम्म कुनै छलफल नै नभएको उहाँले बताउनुभयो ।
