काठमाडौं । नेकपा (एकीकृत समाजवादी) का सम्मानित नेता एवम् पूर्वप्रधानमन्त्री झलनाथ खनालले पाँच दलीय गठबन्धनमा मतभेदका कुरा नउठाइने बताउनुभएको छ । अमेरिकी आर्थिक सहयोग परियोजना मिलेनियम च्यालेन्ज कम्प्याक्ट (एमसीसी) बारे पाँच दलबीच साझा धारणा नबनेको र विवादित विषय भएकाले अहिले सो विषय यथास्थितिमा रहने खनालले बताउनुभयो ।
खनाल पाँच दलीय गठबन्धनले बनाएको एमसीसी अध्ययन कार्यदलका संयोजकसमेत हुनुहुन्छ । सो समितिमा नेकपा (माओवादी केन्द्र)का नेता नारायणकाजी श्रेष्ठ र नेपाली कांग्रेसका नेता एवम् सञ्चार तथा सूचना प्रविधिमन्त्री ज्ञानेन्द्रबहादुर कार्की सदस्य हुनुहुन्छ ।
एक स्ञ्चारमाध्यमसँगको अन्तर्वार्ताका क्रममा खनालले भन्नुभएको छ, ‘अहिले हामीले मतभेदका कुराहरुलाई उठाउँदैनौँ । हाम्रो बीचमा जुन सहमति हुन्छ, सहमतिका विषयमा लिएर मात्र अघि बढ्छौँ । अब एमसीसी भनेको हाम्रो बीचमा मात्र होइन, सिंगो राष्ट्रमा बहसरविवाद भइरहेको विषय हो। यस्तो विवाद भइरहको विषयलाई हामीले एजेण्डा बनायौँ भने हाम्रो बीचमा एकता त हुँदैन। त्यसकारण यो विषयलाई अहिले हामी प्राथमिकता दिँदैनौँ ।’
पाँच दलीय गठबन्धनको प्रमुख दल कांग्रेस एमसीसी पास गर्ने पक्षमा छ भने अन्य दल भने यही अवस्थामा पास गर्न नहुने अडानमा छन् । गठबन्धनभित्रको राष्ट्रिय जनमोर्चा भने एमसीसी खारेज गर्नुपर्ने पक्षमा छ । एमसीसीकै कारण गठबन्धन टुट्ने चर्चा भइरहेको बेला नेता खनालले त्यसलाई अस्वीकार गर्नुभएको छ ।
‘अहिलेको पाँच दलीय गठबन्धनलाई कुनैपनि मुद्दाले तलमाथि पार्छ भन्ने मलाई लाग्दैन। गठबन्धन जुन उद्देश्य, ध्येय र मिसनका आधारमा बनेको छ, त्यो मिसन पूरा भएकै छैन’ खनालले भन्नुभएको छ, ‘अनि उनीहरु कसरी देब्रे दाहिने लाग्न सक्छन् ? लाग्नै सक्दैनन्। यसो हुनाले अहिलेको पाँच दलीय गठबन्धन दृढतापूर्वक आगामी निर्वाचनसम्म न्युनतम रुपले जान्छ।’
संसदमा लामो समयदेखि अड्किएको एमसीसी पास गराउन अमेरिकाले लगातार दबाब दिइरहेको छ। एमसीसीलाई संसदमा पेश गरेर छिट्टै पारित गराउन प्रधानमन्त्री एवं नेपाली कांग्रेसका सभापति शेरबहादुर देउवाले पहल गर्नुभएको छ । तर, नेता खनालले भने एमसीसीबारे अझै राम्रो अध्ययन नभइसकेकाले कुनै पनि दबाबमा आधारमा यसलाई अगाडि बडाउन नहुने दृढता देखाउनुभएको छ ।
‘हामीले त्यो विषयलाई ठोस् ढंगले राखेर अहिलेसम्म छलफल नै गरेका छैनौँ’ खनालले भन्नुभयो, ‘त्यो विषयमा छलफल गर्नको लागि त्यो विषय के हो ? त्यो कसरी जन्मियो ? त्यो कसरी विकसित हुँदै आयो ? सम्झौता कसरी भयो ? कस्ता कस्ता देशबाट सम्झौता भएको छ ? कतिवटा दस्तावेज छन् ? यी सबै कुराहरूको साङ्गोपाङ्गो अध्ययन गरेर मात्र एउटा निष्कर्षमा पुग्नुपर्ने हुन्छ।’
उहाँले आफू नेतृत्वको समितिले सांगोपांगो अध्ययन गरेर प्रधानमन्त्रीलाई प्रतिवेदन बुझाउने र त्यसबारे मन्त्रिपरिषदले नै निर्णय गर्ने बताउनुभएको छ । तर, अहिले नै एमसीसी अस्वीकार गर्ने वा अमेरिकाले दिएको डेटलाइनलाई स्वीकार गर्ने निष्कर्षमा आफूहरु नपुगेको खनालले बताउनुभयो ।
