कञ्चनपुर । नेकपा (माओवादी केन्द्र) ले मसालबाट कारबाहीमा परेका केही व्यक्तिसँग ‘पार्टी एकता’ भन्दै तामझामका साथ भित्र्याएपछि कार्यकर्तामा असन्तुष्टि बढेको छ । असन्तुष्ट कार्यकर्ताले कञ्चनपुरमा एक भेला गरी पार्टीबाट विद्रोहको चेतावनी दिएका छन् ।

माओवादीका पूर्वकेन्द्रीय सदस्य खडक बस्नेत, पूर्वसंविधानसभा सदस्य कमल क्षेत्री, पूर्वजिल्ला इन्चार्ज वीरबहादुर राजवंशी, पुराना नेताहरु रामबहादुर गुरुङ , मिनराज गिरी, विपिन दहित, गगन विक, पूर्व जनमुक्ति सेनाका डिभिजन कमाण्डर रक्तविज, आदर्शलगायतले भेला गरी पार्टीका त्यागी र पुराना कार्यकर्तालाई पाखा लगाउँदै नवप्रवेशीहरुलाई अगाडि बढाउन खोजेकोमा असन्तुष्टि जनाएका छन् ।

माओवादी केन्द्रको राजधानीमा आठौं महाधिवेशन चलिरहँदा कार्यकर्ताले भने पुरानालाई पाखा लगाएर नयाँलाई काखी च्यापेको भन्दै भेला गरेर असन्तुष्टि जनाएका हुन् । यही पुस ९ गते माओवादीले मसालबाट कारबाहीमा परेका केही जिल्लातहका कार्यकर्तासँग राजधानीमा ‘पार्टी एकता’ गरेको थियो ।

सोमबार कञ्चनपुरको कलुवापुरमा भएको सो भेलामा पार्टीभित्र देखिएको संगठनात्मक अराजकता सच्याउन पार्टीलाई सुझाव दिएको विद्रोही मध्येका एक नेताले बताए । पार्टीले कार्यकर्ताहरुको धारणा नसुनेमा ठूलो विद्रोह हुनसक्ने उनले चेतावनी दिएका छन् ।

‘माओवादी पार्टीभित्र ब्यापक संगठनात्मक अराजकता छ । नेताको चाकडी गर्ने र जी-हजुरी गर्नेले जिम्मेवारी पाएका छन् । कार्यकर्ताको त्याग र इमानदारीताको कुनै मूल्यांकन नै छैन’ ती नेताले युगदर्शनसँग भने, ‘हामीले पार्टीलाई सच्याउन दबाब दिने उद्देश्यले भेला राखेका हौँ । भेलामा सानै संख्या उपस्थित भएपनि भित्रभित्र असन्तुष्ट कार्यकर्ताको ठूलो जमात छ । पार्टीले हाम्रो कुरा नसुने विद्रोह नहोला भन्न सकिँदैन।’

उनले मसालले कारबाही गरेका व्यक्तिहरुलाई पार्टी एकता भन्दै भित्र्याएकोमा अचम्म लागेको बताए ।

उनले भने, ‘न कुनै जनाधार छ, न त कार्यकर्ता र जनताले सहजै स्वीकार गर्नसक्ने अवस्था छ । मसालले जिम्मेवारीविहीन बनाएका ८/१० जनालाई पार्टी एकता भनेर भित्र्याएर के नाटक गरेको होला ।’

उनले राष्ट्रिय जनमोर्चाबाट अहिले माओवादीमा भित्रिएका नवप्रवेशीहरु पैसा कमाउनकै लागि माओवादी प्रवेश गरेको दाबी पनि गरे । राजनीतिकरुपमा उनीहरु अघि बढ्न नसक्ने ठोकुवा गर्दै ती नेताले नवप्रवेशीहरुले विभिन्न ठाउँमा सेटिङ मिलाएर पैसा कमाउन सक्ने र त्यसैको लागि माओवादीमा प्रवेश गरेको बताए ।

यस्तै, असन्तुष्ट मध्येका अर्का एक पुराना नेताले माओवादीमा हालै प्रवेश गरेका व्यक्तिहरुलाई आफूहरुले नेता स्वीकार गर्न नसक्ने बताएका छन् ।

‘बरु माओवादीमा विद्रोह हुन्छ । तर नेता स्वीकार गर्दैनौं’ उनले युगदर्शनसँग भने, ‘माओवादी संसदीय पार्टी भएकोले मानिसहरु भित्रिनु स्वाभाविकै हो । तर, पुराना र त्यागी नेताहरुलाई पाखा लगाएर जनाधार बिनाका नवप्रवेशीलाई नेता स्वीकार गर्ने कुरा हुँदैन ।’

सोमबार भएको भेलामा कञ्चनपुरका ४१ जना नेता कार्यकर्ताले सहभागिता जनाएका थिए । उनीहरुले गरेको छलफलको निष्कर्ष पार्टी केन्द्रीय कार्यालयमा पठाएको बुभिएको छ ।

छलफलमा पार्टीको संगठनात्मक अवस्थासहित ‘पार्टीको विकास, विस्तार र नयाँ प्रवेशीहरुको स्थान र व्यवस्थापनबारे (बुँदा नं ४)’ छलफल भएको छलफलमा सहभागी नेताहरुले जानकारी दिएका छन् ।