बुटवल । राष्ट्रिय जनमोर्चाका अध्यक्ष चित्रबहादुर केसीले मसाल वा राजमो छाडेर दर्जनौं व्यक्तिहरू अन्य पार्टीमा गएको समाजिक सञ्चार माध्यमहरूमा गरिएको प्रचार भ्रामक र तथ्यहिन भएको बताउनु भएको छ । उहाँले केही अनुशासनविहीन अवसरवादीहरू मात्रै ‘तर खान पाउँछौं कि’ भनेर प्रपंच रचेको बताउनुभयो ।
‘राष्ट्रिय जनमोर्चाले सधैँभरि देश र जनताको पक्षमा काम गरिरहेका तथ्यहरू प्रस्टाउँदै नेता केसीले हाम्रो पार्टीमा बसेर ब्यक्तिगत लाभ र फाइदा कसैले लिन पाउँदैनन्’ उहाँले भन्नभयो, ‘अवसरवादीहरू व्यक्तिगत फाइदा कै लागि पार्टीमा लागेका हुन्छन् र आफ्नो त्यो स्वार्थ पूरा नभए पछि पार्टी छोड्छन्।’
राजमो शियारी–सुद्दोधन गाउँपालिकाले फर्साटिकरमा आयोजना गरेकोे कोणसभालाई सम्वोधन गर्दै राजमो अध्यक्ष केसीले संघीयताको कारण देश असफल राष्ट्र तिर गएको आरोप लगाउनु भयो । उहाँले संघीयता लागू गर्दा संसदमा प्रतिनिधित्व गर्ने २५ पार्टी मध्ये एक्लै राजमोले मात्रै विरोध गरेको भए पनि अहिले अन्य पार्टीहरू पनि त्यसमा सामेल भएको र ठूला पार्टीहरूको लागि पनि घाटीमा अड्किएको हड्डी’ समान भएकोले आम नेपाली जनता पनि संघीयता खारेजीको अभियानमा सचेत भएकोमा खुसी व्यक्त गर्नुभयो ।
सिंहदरवारमा मात्रै हुने संसदको मोलमोलाई सातै प्रदेशमा सुरूभएको र रिसाएका र भाग्न खोज्ने सांसदहरूलाई मन्त्रालय फुटाएरै भए पनि मन्त्री बनाउने रमिताले संघियता नेपाली जनताले धान्न नसक्ने सावित भैसकेको बताउनुभयो । संघीयता सहितको प्रदेशको कुनै काम र औचित्य नभएको पुष्टि भैसकेको भन्दै नेता केसीले विदेशबाट रिण काढेर संघीयता धान्न नसकिने भएकोले यसको खारेजीको विकल्प नभएको बताउनुभयो ।
एमसीसीको अमेरिकाले नेपाली जनताले बाटो नभएर दुःख पाए, बिजुली बेच्न पाएनन् भनेर टिठले यो परियोजना ल्याउन खोजेको हैन भन्दै नेता केसीले नेपाललाई वेस बनाएर चीनलाई तहस नहस पार्ने रणनीति अनुसार काम गरिरहेको बताउनुभयो ।
चीनको अर्थव्यबस्थाले साम्राज्यवादी रूप धारण गरिसकेको बताउदै विश्व बजारमा चीनको दवदबा समाप्त पार्न सिधा सैनिक हस्तक्षेपबाट उसलाई तहसनहस को अमेरिकी रणनीतिमा नेपाली भूमि प्रयोग गरिनु देशको लागि अत्यन्त घातक हुने औँल्याउनुभयो।
पटक पटक समय सिमा बढाउदै एमसिसी जसरी पनि पास गर्ने अमेरिकी रणनीतिलाई असफल पार्न आम नेपाली जनता सडकमा आएर देशभक्तिपूर्ण आन्दोलनमा सरिकहुन आव्हान गर्नुभयो ।विदेशीबाट रकम खाएर यो वा त्यो बाहाना एमसीसी पास गर्ने कार्य देशको सार्वभौमसत्ता, एकता र अखण्डताको बिरूद्ध हुनेछ भन्दै संशोधन गरेर पनि एमसीसी पास गर्न नमिल्ने नेता केसीले बताउनुभयो । देश बचाउन र निर्माण गर्न हाम्रा पुर्खाहरूले जेजति संघर्ष र वलिदान गरे त्यसको रक्षाको लागि सागुरो घेराबाट बाहिर निस्कन सबैलाई अनुरोध गर्नुभयो ।
विगत सरकारको प्रतिगमनको प्रयास अहिले पनि कायम रहेको बताउदै केसीले एकबर्षबाट प्रतिनिधि सभा चल्न नदिएर जनप्रतिनिधि संस्थालाई कामकाज विहिन बनाउने प्रयास गणतन्त्र विरोधी भएको भन्दै व्यवस्थापिका,कार्यपालिका र न्यायपालिका समेतको हविगतले प्राप्त उपलब्धिहरू समेत धरापमा परेको बताउनुभयो।
प्रतिगमनलाई परास्त गर्न गठबन्धनले महत्त्वपूर्ण भूमिका खेलेको भए पनि एमसिसी लगायतका बिषयमा सरकारको भूमिका नकारात्मक रहेको बताउनुभयो । नेपाली जनताको दशकौ लामो संघर्ष बाट प्राप्त उपलब्धिहरूको रक्षा गर्न गत सरकारको प्रतिगमनको प्रयास असफल पार्न गठबन्धन बनाएको बताउँदै राजमो अध्यक्ष केसीले यो सरकारका राष्ट्रघाती कार्यमा आफ्नो पार्टी कदापि साक्षी नबस्ने बताउनुभयो ।
अखिल (छैठौं) का केन्द्रीय अध्यक्ष देवेन्द्र कुँवरले सञ्चालन गर्नुभएको कोण सभामा राजमो केन्द्रीय सदस्य नारायण जिसीले पनि सम्वोधन गर्नुभएको थियोे ।
