काठमाडौं । उपत्यकाका विभिन्न स्थानबाट मोटरसाइकल चोरेर बिक्री वितरण गर्ने गिरोहलाई ट्राफिक प्रहरीले नियन्त्रणमा लिएको छ ।
महानगरीय ट्राफिक प्रहरी महाशाखाबाट सादा पोसाकमा खटिएको टोलीले काठमाडौंका बिभिन्न स्थानबाट मोटरसाईकल चोरी गर्ने, डिस्मेण्टल गर्ने र बिक्रि बितरण गर्ने समूहका ७ जनालाई पक्राउ गरेको हो ।

टोलीले रौतहट चन्द्रनिगाहापुर– ९ सन्तपुर घर भई हाल किर्तिपुर बस्ने १९ बर्षका नर कुमार पुडासैनीलाई गत बर्षको माघमा बानेश्वरबाट हराएको प्र३–०२–०१३प ३६६० नम्बरको २२० सिसिको पल्सर मोटरसाईकलको नम्बर परिबर्तन गरि चलाईरहेको अबस्थामा पशुपति क्षेत्रबाट पक्राउ गरेका हो ।

थप अनुसन्धानको क्रममा न्युरोडबाट जुम्ला सिंङ्जा गाउँपालिका–६ का हाल किर्तिपुर वस्ने २० बर्षीय पुन्दलाल बुढालाई मोटरसाईकल सहित पक्राउ गरेको छ। गत मंसिर ८ गते बत्तिसपुतलीबाट हराएको बा.प्र.०२–०२२प ६५१८ नम्बरलाई परिबर्तन गरि बा.प्र–०२–०२५प १३९१ प्रयोग गरेको अबस्थामा यामाहाको मोटरसाईकल सहित बुढा पक्राउ परेका हुन ।

किर्तिपुर एरियाबाट काठमाडौंका २२ बर्षीय सन्तोष महर्जन सहित रौतहट गुजरा नगरपालिका २ घर भई हाल सानोभर्याङ बस्ने ३४ बर्षका ज्ञानेन्द्र चौधरी, रौतहट गुजरा नगरपालिका ३ घर भई हाल बानेश्वर बस्ने ३२ बर्षका रवि कुमार कुशवाहा, उदयपुर घर भई हाल किर्तिपुर बस्ने कमल बहादुर बस्नेत र बारा गढिमाई घर भई किर्तिपुर बस्ने २२ बर्षका रन्जित प्रसाद गुप्तालाई पक्राउ गरिएको ट्राफिक महाशाखाका प्रमुख प्रहरी वरिष्ठ उपरीक्षक जनक भट्टराईले जानकारी दिनुभयो ।

पक्राउ परेका चौधरी यस भन्दा अघि पनि मोटरसाईकल चोरीमा कारबाही भोगेका व्यक्ति हुन् । रौतहटका चौधरी र कुशवाहा मोटरसाईकल चोरी गिरोहका मुख्य व्यक्ति रहेको समेत अनुसन्धानबाट देखिएको एसएसपी भट्टराईले जानकारी दिनुभयो ।

त्यसैगरि किर्तिपुरबाट पक्राउ परेका रंजित प्रसाद गुप्ताले चोरी गरि ल्याएका मोटरसाईकलहरुलाई ग्यारेजमा सुरक्षित राख्ने, सामानहरु डिस्मेण्टल गर्ने र फेरबदल गर्ने गरेको समेत देखीएको भट्टराईको भनाई छ ।

गुप्ता किर्तिपुरमा रहेको रंजित मोटरसाईकल वर्कसपका सञ्चालक समेत रहेको खुल्न आएको महाशाखाले जनाएको छ । पक्राउ परेका गुप्ता र सन्तोष महर्जनले ग्राहकहरु खोज्ने र सस्तो मुल्यमा मोटरसाईकलहरु किनवेच गर्ने मुख्य भुमिका समेत खेल्ने गरेको अनुसन्धानबाट खुल्न आएको महाशाखाले बताएको छ ।

बरामद गरेका ७ थान मोटरसाइकल मध्य एउटा यामाहाको र अन्य ६ ओटा २२० सिसिको पल्सर मोटरसाइकल रहेको महाशाखाले जनाएको छ । त्यस्तै गरि ईन्जिन तथा विभिन्न भागहरू काटेर टुक्रा पारेको अवस्थामा यहि असोजमा ताहाचलबाट हराएको बा–प्र–०२–१९प ९४९८ नम्बरको २२० सिसि पल्सर मोटरसाईकल समेत बरामद गरेको महाशाखले जानकारी दिएको छ ।

पक्राउ गरिएको मोटरसाईकल र चोरीमा संलग्नहरूलाई आवश्यक कारवाहीको लागि विभिन्न महानगरीय प्रहरी वृत्तहरूमा पठाईएको महाशाखाले जनाएको छ ।