काठमाडौँ । प्रगतिशील लेखक सङ्घ, नेपालका महासचिव समीर सिंहको दोस्रो पुस्तकाकार कृति “साङ्ख्य दर्शन र माक्र्सवाद” प्रकाशित भएको छ ।
नेपाल प्रज्ञा–प्रतिष्ठान प्रकाशक रहेको सो कृति २०७८ मङ्सिर ९ गते विमोचन गरिएको हो ।
पुस्तकमा प्रज्ञा–प्रतिष्ठानका कुलपति गङ्गाप्रसाद उप्रेतीको प्रमुख मन्तव्य रहेको छ । त्यसैगरी, पुस्तकमा उपकुलपति डा. जगमान गुरुङको प्रकाशकीय र दर्शन विभागका प्रमुख तथा प्रज्ञा–प्रतिष्ठानका सदस्य सचिव प्रा. जगत् उपाध्याय ‘प्रेक्षित’ को विभागीय मन्तव्य रहेको छ ।
पूर्वीय भूगोलमा प्राचीन भौतिकवादको रूपमा रहेको साङ्ख्य दर्शनबारे विवेचना गर्दै पुस्तक तीन खण्डमा विस्तारित छ । पहिलो खण्डमा साङ्ख्य दर्शनको परिचय, दोस्रो खण्डमा माक्र्सवादी दर्शन र तेस्रो खण्डमा साङ्ख्य दर्शन र माक्र्सवादी दर्शनको तुलनात्मक अध्ययनबारे चर्चा गरिएको छ । पुस्तकको सुरुमा दर्शनशास्त्र, प्रत्ययवाद, भौतिकवाद र नेपालमा दर्शनशास्त्रको बारेमा छलफल चलाइएको छ भने अन्तिम लेखकले आफ्नोतर्फबाट निष्कर्ष प्रस्तुत गर्नुभएको छ ।
डिमाइ आकारमा १९२ पृष्ठको सो पुस्तकको फुटकर मूल्य २२५ नेरु राखिएको छ ।
नेकपा (मसाल) बागमती प्रदेशका प्रवक्तासमेत रहनुभएका सिंहको यसअघि “पूर्वीय दर्शनमा भौतिकवादको खोजी” शीर्षकको पुस्तक पुस्तक प्रकाशित भइसकेको छ ।
त्यस्तै, उहाँले दर्शन तथा विभिन्न समसामयिक विषयमा निरन्तर कलम चलाउँदै आउनुभएको छ ।
