काठमाडौं । नेपाल कम्युनिस्ट पार्टी (मसाल) ले तत्कालीन अखिल भारत नेपाली एकता समाजका संस्थापक उपसभापति रामचन्द्र पौडेलेको निधनप्रति दुःख प्रकट गरेको छ ।
प्रवक्ता रामप्रकाश पुरीले शुक्रबार एक शोक विज्ञप्ति प्रकाशित गरी पौडेलको मृत्युप्रति गम्भीर दुःख प्रकट गर्दै सन्तप्त परिवारजनप्रति समवेदना प्रकट गर्नुभएको छ ।
शोक विज्ञप्तिमा मसालले भारतस्थित प्रवासी नेपालीहरूको हक र अधिकारको रक्षा गर्दै नेपालको जनवादी तथा प्रजातान्त्रिक आन्दोलनलाई सहयोग पुर्याउन एकता समाजले धेरै नै महत्वपूर्ण भूमिका खेलेको बताएको छ ।
यस्तो छ वक्तव्यः
‘चितवन जिल्ला कालिका नगरपालिका–५ पदमपुर निवासी का. रामचन्द्र पौडेलको क्यान्सर रोगबाट काठमाडौमा मृत्यु भएको छ । उहाँको मृत्युप्रति हामीले गम्भीर दुःख प्रकट गर्दै सन्तप्त परिवारजनप्रति समवेदना प्रकट गर्दछौँ । का. पौडेल तत्कालीन अखिल भारत नेपाली एकता समाजको संस्थापक उपसभापति हुनुहुन्थ्यो । उहाँले तेस्रो राष्ट्रिय सम्मेलनबाट महासचिवको जिम्मेवारी पनि बहन गर्नुभएको थियो ।
भारतस्थित प्रवासी नेपालीहरूको हक र अधिकारको रक्षा गर्दै नेपालको जनवादी तथा प्रजातान्त्रिक आन्दोलनलाई सहयोग पु-याउन त्यो सामाजिक संगठनले धेरै नै महत्वपूर्ण भूमिका खेलेको थियो । त्यसरी त्यस प्रकारको महत्वपूर्ण संगठनको संस्थापक उपसभापति भएर उहाँले प्रवासी नेपालीहरुको हक अधिकारका साथै नेपालको जनवादी तथा प्रजातान्त्रिक आन्दोलनमा समेत योगदान दिनुभएको थियो ।
पछिल्लो समयमा उहाँ हाम्रो पार्टीबाट अलग्गिनुभएको भएपनि नेपाली कम्युनिस्ट आन्दोलनभित्र नै उहाँ क्रियाशील भइरहनु भएको थियो । उहाँको मृत्युबाट नेपालको कम्युनिस्ट आन्दोलनमा गम्भीर क्षति पुगेको छ । अन्तमा हामीले उहाँप्रति हार्दिक श्रद्धाञ्जली अर्पण गर्दछौँ ।’
