प्युठान । अखिल नेपाल राष्ट्रिय स्वतन्त्र विद्यार्थी युनियन (छैठौं) जिल्ला समिति, प्यूठानले जिल्लाको स्वर्गद्वारी क्याम्पसमा तोडफोड गरी क्षति पुर्याउनेमाथि कारबाही गर्न माग गरेको छ ।
जिल्ला अध्यक्ष नवीन केसीले बुधबार विज्ञप्ति प्रकाशित गरी तोडफोडमा संलग्नलाई कडा कारबाही गर्न, क्षतिको क्षतिपुर्ति भराउन तथा तोडफोड गरिएका भौतिक संरचना तत्काल निर्माण गरी पठनपाठन सूचारू गर्न आग्रह गर्नुभएको छ ।
स्वर्गद्वारी बहुमुखी क्याम्पस पुण्यखोलामा नेपाली कांग्रेसको जिल्ला अधिवेशनमा भएको विवादका कारण मंगलबार क्याम्पसको भवनमै तोडफोड भएको थियो । तोडफोडबाट झ्यालढोका र फर्निचरमा लाखौंको क्षति भएको छ । घटनामा सात जना घाइते भएका थिए ।
‘विद्यार्थीहरुले भविष्य निर्माण गर्ने शौक्षिक थलोमा गुण्डागर्दी हुनु, गोली चल्नु, केही व्यक्ति घाइते हुने अवस्था निकै लज्जास्पद छ’ अखिल (छैठौं)ले विज्ञप्तिमा भनेको छ, ‘क्याम्पसमा भएको तोडफोडको निन्दा र भर्त्सना गर्दै तोडफोडबाट भएको भौतिक क्षति सम्बन्धित पक्षबाट क्षतिपूर्ति गराउन, तोडफोडमा संलग्न व्यक्तिहरूलाई कडा कारबाही गर्न माग गर्दछौं ।
तोडफोड गरिएका भौतिक संरचना तत्काल निर्माण गरी विद्यार्थीको पठनपाठन सूचारू गर्न क्याम्पस प्रसासनको ध्यानाकर्षण गराउन चाहान्छौ ।’
यो पनि : कांग्रेसको मतगणनामा भएको तोडफोडको क्षतिपुर्ति भर्न स्वर्गद्वारी क्याम्पसको माग
