धनगढी । महाधिवेशन प्रतिनिधि छनोटमा नेकपा (एमाले) का अध्यक्ष केपी ओली पक्षले कैलालीमा एकलौटी गरेको भन्दै भीम रावल पक्षले नयाँ प्रतिनिधि छनौट गरेको छ ।
एमालेको १० औँ राष्ट्रिय महाधिवेशन प्रतिनिधि छनोटमा असन्तुष्ट उपाध्यक्ष रावल पक्षले बुधबार नयाँ प्रतिनिधि छनोट गरेको हो ।
कैलालीको लम्कीस्थित मनोहरा होटलमा सम्पन्न भेलाले सर्वसम्मत रुपमा ९ जना प्रतिनिधि छानेको एमाले सुदूरपश्चिम प्रदेश कमिटीका सदस्य एंवम् लम्कीचुहा नगरपालिकाका मेयर महादेव बजगाईँले बताए ।
उनका अनुसार यज्ञराज ढुङगाना, मनोज खड्का, रुप रावल, सुर्य बहादुर थापा, बिरेन्द्र रावल, भीम कुँवर, ममता रावल, गंगा थापा र बसुन्धरा भण्डारी महाधिवेशन प्रतिनिधि चयन भएका छन् ।
भेलामा निर्वाचन क्षेत्र नम्बर २ का १ हजार २ सय ८० जना संगठित सदस्यको सहभागीता रहेको उनको दाबी छ । निर्वाचन क्षेत्र नम्बर २ मा ‘अध्यक्ष केपी शर्मा ओली पक्षले एकलौटी रुपमा प्रतिनिधि छनोट’ गरेको भन्दै रावल पक्ष असन्तुष्ट बनेको थियो ।
यसअघि कैलाली–२ मा संस्थापन पक्षले एमाले कैलालीका अध्यक्ष रतन थापा, डेजी पाण्डे, दल बहादुर विष्ट, नर बहादुर खड्का, कमला ओली, टीका थापा, पदमपुरा साउँद, गजेन्द्र स्वार र धरम बहादुर थापा मगरलाई महाधिवेशन प्रतिनिधि चयन गरेको थियो ।
