काठमाडौं । ससुरालीले कुटपिट गरेको भन्दै धनुषाका एक युवकले ससुरालीमै आत्महत्या गरेका छन् । मिथिला नगरपालिका–२ का २६ वर्षीय रामचन्द्र महतोले सोमबार राति सुसाइड नोट लेखेर मिथिला नगरपालिका वडा नम्बर ५ श्रीपुरस्थित ससुराली घरमा झुण्डेर आत्महत्या गरेका हुन् ।
उनले सुसाइड नोटमा आफूलाई सुसुरालीका सबै सदस्य मिलेर निर्घात कुटपिट गरेकाले आफ्नो मृत्यु भए त्यसको जिम्मेवार ससुरालीको परिवारै हुने लेखेका छन् ।
‘म रामचन्द्र महतो, म आफ्नो पूरै होस् हवासमा लेख्दै छु कि मेरो यदि कुनै कारणवश मृत्यु भयो भने त्यसको सम्पूर्ण जिम्मा मेरो ससुरालीका सम्पूर्ण सदस्यहरूको हुने छ’, उनले सुसाइड नोटमा लेखेका छन्, ‘किनकि मलाई उनीहरूले मिति २०७८।७।२९ गतेका दिन बेलुकातिर सबै जना मिली कुटेको छ र टर्चर गरेकोले मलाई यसले धेरै मन दुख्ने गाली गरेकोले म आत्महत्या गर्न गइरहेको छु ।’
घटनापछि सासू सुमित्रा देवी र सालो श्रवण महतोलाई नियन्त्रणमा लिएर अनुसन्धान सुरु गरेको प्रहरीले जनाएको छ । मृतकका दुई छोरा छन् ।
