काठमाडौं । प्रधानन्यायाधीश चोलेन्द्र शमशेर जबराको राजिनामा माग गर्दै नेपाल बार एसोसिएसनले गरेको आन्दोलनमा प्रहरीले हस्तक्षेप गरेको छ । त्यसक्रममा ६ जना कानुन व्यवासायी घाइते भएका छन् ।
अखिल नेपाल कानुन व्यावसायी संघ (अन्ला) का अध्यक्ष पदम रोकाका अनुसार प्रहरीसँगको झडपमा बार महासचिव लीलामणि पौडेल, पूर्व उपाध्यक्ष कुमार शर्मा आचार्य, नेपाल बारका केन्द्रीय सदस्य रमन कर्ण र उच्च बार पाटनका सदस्य मुकुन्द भट्टराई घाइते हुनुभएको छ । उहाँहरुलाई सामान्य चोटपटक लागेको छ ।
बिहीवार सर्वोच्च अदालत प्राङ्गणमा विरोधको कार्यक्रम गर्न पुगेको बारका पदाधिकारी लगायतका अधिवक्ताहरुलाई प्रहरीले बल प्रयोग गरी सर्वोच्च प्राङ्गणबाट बाहिर निकालेको थियो । माइक राखेर कार्यक्रम गर्न खोज्दा प्रहरीले माइक हटाइ अधिवक्ताहरुलाई सर्वोच्च अदालतको प्राङ्गण बाहिर निकालेको हो ।
विरोध कार्यक्रममा बोल्दै नेपाल बार एसोसिएसनका अध्यक्ष चण्डेश्वर श्रेष्ठले प्रधानन्यायाधीशविरुद्धको आन्दोलनमा बार मात्रै लागेर नपुग्ने भन्दै आम नागरीकहरु राजिनामा माग्दै सडकमा आउनुपर्ने बताउनुभयो । उहाँले न्यायपालिकाको सुधारमा बाधक बन्नेहरुको राजिनामा पछि पनि सम्पति विवरण सार्वजनिक गर्ने र जफत गराउन लाग्ने बताउनुभयो ।
उहाँले आफुहरुलाई स्वच्छ, निर्भिक र स्वतन्त्र प्रधानन्यायाधीश चाहिएको उल्लेख गर्दै त्यस किसिमको प्रधानन्यायाधीश नल्याउञ्जेल आन्दोलन जारी रहने बताउनुभयो ।
कार्यक्रमलाई बारका अन्य पदाधिकारीहरुले पनि सम्बोधन गरेका थिए । यस्तै, अन्लाका अध्यक्ष रोकाले सभालाई सम्बोधन गर्दै न्यायपालिकाभित्रका विकृतिको अन्त्य गर्न सबभन्दा पहिला प्रधानन्यायाधीश चालेन्द्र शमशेर जबराले राजीनामा दिनुपर्ने बताउनुभयो ।
सर्वोच्चमा भएको विरोध प्रदर्शनमा बिचौलियाको नाइके राजिनामा दे, भ्रष्टाचारी नाइके राजिनामा दे, नेपाल बार जिन्दावाद, भ्रष्ट प्रधानन्यायाधीश राजिनामा दे, प्रहरी आतंक बन्द गर, हाम्रो आन्दोलन जारी छ भनि नाराबाजी समेत भएको थियो ।
