हेटौंडा । बागमती प्रदेशका मुख्यमन्त्री अष्टलक्ष्मी शाक्यले राजीनामा दिनुभएको छ । बुधबार बसेको प्रदेशसभा बैठकमा उहाँले राजीनामा घोषणा गर्नुभएको हो ।
मुख्यमन्त्री शाक्यले प्रदेशसभा बैठकमा आफूले पेस गरेको विश्वासको मतमाथि भएको छलफलमा उठेका प्रश्नको जवाफ दिँदै राजीनामाको घोषणा गर्नुभयो ।
‘आपसी द्वन्द्वलाई कम गरौं’ भन्ने मनसायले आफूले ‘मार्ग प्रशस्त’ गर्ने निर्णय लिएको उहाँले बताउनुभयो । प्रदेशसभामा विश्वासको मतसम्बन्धी प्रस्तावमाथि मत विभाजन हुनु अघि उहाँले राजीनामा दिनुभएको हो ।
गत भदौ २ गते मुख्यमन्त्री नियुक्त भएकी शाक्य एमाले विभाजनसँगै अल्पमतमा परेपछि राजीनामा दिन बाध्य हुनुभएको हो ।
संविधानको धारा १६९ को उपधारा १ (क) मा भएको व्यवस्था अनुसार आफूले ‘मार्ग प्रशस्त’ गर्ने शाक्यले प्रदेशसभा बैठकलाई जानकारी दिनुभयो ।
त्यस क्रममा बोल्दै मुख्यमन्त्री शाक्यले छोटो समयमा आफूलाई केही उपलब्धिमूलक काम गर्न सबै पक्षबाट सहयोग भएको भन्दै सबैलाई धन्यवादसमेत व्यक्त गर्नुभयो ।
