विराटनगर । नेकपा (एमाले)का अध्यक्ष केपी शर्मा ओलीले पार्टीका उपाध्यक्ष भीम रावलसँग स्पष्टीकरण माग गर्ने बताउनुभएको छ । सुदूरपश्चिममा वडा सम्मेलन नभएको विषयमा अभिव्यक्ति दिएको भन्दै उपाध्यक्ष रावलसँग जवाफ माग्ने ओलीले बताउनुभएको हो ।
प्रेस चौतारी मोरङले मंगलबार विराटनगरमा आयोजना गरेको पत्रकार सम्मेलनमा बोल्दै उहाँले एक दुई जनाले के भन्छन्, त्यसको महत्व नहुने बताउनुभयो ।
‘एकदुई जनाले के भन्छन्, त्यसको कुनै मतलब भएन, उहाँ (भीम रावल) ले किन त्यस्तो भन्नुभयो, म सोध्छु’ ओलीले भन्नुभयो ।
उपाध्यक्ष रावलले सुदूरपश्चिमका कुनै पनि जिल्लामा एमालेको वडा अधिवेशन नभएको बताउनुभएको थियो । दश बुँदे सहमति गरेर एमालेमै फर्किएका रावलको समूह ओलीले ‘दश बुँदे सहमति केही होइन’ भनेपछि पार्टीमा फरक मत राख्दै ओलीसँग रुष्ट बनेको छ ।
फरक प्रशंगमा एमाले अध्यक्ष ओलीले प्रधानन्यायाधीशले राजीनामा दिनुपर्ने या नपर्ने कुरामा एमालेले पक्षधरता नलिने बताउनुभयो । उहाँले अदालतभित्र भइरहेको दाउपेचमा आफूहरु नपस्ने पनि स्पष्ट पार्नुभयो । अहिलेको परिस्थितिमा एमालेले प्रधानन्यायाधीशको राजीनामा पनि नमाग्ने र महाभियोगको पक्षमा पनि नउभिने उहाँको भनाई थियो ।
‘हाम्रो चिन्ता सर्वोच्च अदालतलाई जनताले विश्वास गर्ने, राज्यको एउटा विश्वसनीय र महत्वपूर्ण अङ्गको रुपमा राख्ने हो,’ उहाँले भन्नुभयो, ‘हामीलाई दाउपेचमा पस्नु छैन । सर्वोच्च अदालतभित्रको अशोभनीय गुटबन्दीमा पस्नु छैन ।’
त्यस्तै, ओलीले अहिले देशमा भद्रगोल भइरहेको भन्दै चुनावमा जानुपर्ने बताउनुभयो ।
