काठमाडौँ । प्रगतिशील लेखक सङ्घ, नेपालले सुदूर पश्चिम प्रदेशको प्रगतिशील साहित्यबारे उनन्चासौँ परिसंवाद सम्पन्न गरेको छ ।

२०७८ कात्तिक ५ गते भर्चुअल माध्यमबाट सम्पन्न सो कार्यक्रममा केन्द्रीय सल्लाहकार डा. पुष्करराज भट्टले “सुदूर पश्चिम प्रदेशको प्रगतिशील साहित्य : विगत र वर्तमान” विषयमा मन्तव्य राख्नुभएको थियो ।

सो अवसरमा उहाँले सुदूर पश्चिममा प्रगतिशील साहित्यको त्यति पुरानो इतिहास नरहे पनि त्यहाँको लोकसाहित्यमा प्रशस्त मात्रामा प्रगतिशील तत्त्व रहेको दाबी गर्नुभयो ।

किसान नेता भीमदत्त पन्त र राष्ट्रियताको बारेमा प्रखर कुरा उठाएका प्रेमसिंह धामीको प्रसङ्ग उठाउँदै उहाँले सुदूर पश्चिममा लोकसाहित्यभित्र पनि समाज परिवर्तनको आवाज प्रशस्त मात्रा पाउनु सकारात्मक विषय भएको बताउनुभयो ।

उहाँले सुदूर पश्चिम क्षेत्रबाट साहित्य, कला, इतिहास, दर्शन सबै क्षेत्रमा व्यापक सङ्ख्यामा काम भएको पनि बताउनुभयो ।

‘खास गरी सुदूर पश्चिम प्रदेशको प्रगतिशील साहित्यमा कविता विधा प्रखर छ’ उहाँले भन्नुभयो– ‘त्यसमध्ये पनि गीत र गजलको क्षेत्रमा धेरै साहित्यकारहरूले राम्रो साहित्य सृजना गरिरहेका छन् ।’

मन्तव्यको क्रममा उहाँले त्यस क्षेत्रमा रहरका लागि लेख्ने प्रचलन यथावत रहेकोमा त्यसलाई अब वैचारिक प्रतिबद्धतामा ढाल्नुपर्ने आवश्यकता रहेकोमा जोड दिनुभयो ।

सम्बोधनको क्रममा उहाँले सुदूर पश्चिम प्रदेशमा प्रगतिशील लेखनको इतिहास, प्रगतिशील लेखक सङ्घको सङ्गठनात्मक गतिविधि, विभिन्न विधामा लेखिएका साहित्य र साहित्यकार, साहित्यिक सङ्घसंस्थाका गतिविधि जस्ता विषय समेट्नुभएको थियो ।

प्रलेसका अध्यक्ष प्रा.डा. जीवेन्द्र देव गिरीको अध्यक्षता तथा महासचिव समीर सिंहको सञ्चालनमा अघि बढेको उक्त कार्यक्रममा नारायण मरासिनी, बाबुराम आचार्य र पुण्यप्रसाद खरेलले पूरक टिप्पणी राख्नुभएको थियो ।

कार्यक्रममा केन्द्रीय सचिव प्रकाश थापामगर, बाबुराम आचार्य, केन्द्रीय सल्लाहकारहरू राम विनय, प्राडा कपिल लामिछाने, डा. कृष्णराज अधिकारी, पदमप्रसाद शर्मालगायतको आतिथ्यता रहेको थियो ।