काठमाडौँ । नेकपा (एकीकृत समाजवादीं को केन्द्रीय समिति ३३५ सदस्यीय बनेको छ ।
अध्यक्ष माधवकुमार नेपालको हस्ताक्षरमा २०७८ असोज २८ गते जारी गरिएको “अन्तरपार्टी निर्देशन–२” मा त्यसको विस्तृत विवरण दिइएको छ ।
अन्तरपार्टी निर्देशन (अपानी) मा स्थायी कमिटी र पोलिटब्युरोका साथै केन्द्रीय समितिलाई विस्तार गरी कार्यविभाजनसमेत तोकिएको छ ।
एकीकृत समाजवादीमा वरिष्ठ नेता झलनाथ खनाललाई सम्मानित नेताको पदीय हैसियतका साथै उहाँलाई विदेश विभाग प्रमुखको जिम्मेवारीसमेत दिइएको छ ।
२७ पृष्ठको अपानीमा मुकुन्द न्यौपाने र प्रदीप नेपाल उपाध्यक्षभन्दा रोलक्रममा माथि तर झलनाथ खनालभन्दा तलको “नेता” को पदीय हैसियत सृजना गरिएको छ । न्यौपानेलाई उद्योग, वाणिज्य विभाग प्रमुख र उद्योग व्यवसाय फाँट इन्चार्ज तथा नेपाललाई प्रतिष्ठानको इन्चार्जको जिम्मेवारी दिइएको छ ।
४२ सदस्यीय स्थायी कमिटी बनाएको एकीकृत समाजवादीमा ९४ सदस्यीय पोलिटब्युरो रहेको छ । त्यसमध्ये २३ जना वैकल्पिक पोलिटब्युरो सदस्य रहेका छन् ।
अपानीमा ११ सदस्यीय केन्द्रीय सचिवालय, पाँच सदस्यीय केन्द्रीय कार्यालयका साथै प्रत्येकमा ३४ सदस्य रहेको केन्द्रीय अनुशासन आयोग, केन्द्रीय लेखापरीक्षण आयोग र केन्द्रीय निर्वाचन आयोग गठन गरिएको छ ।
त्यसैगरी, १३४ सदस्यीय केन्द्रीय सल्लाहकार परिषद्, ३३ सदस्यीय ज्येष्ठ कम्युनिस्ट मञ्च र ५२ सदस्यीय केन्द्रीय परिषद् गठन गरिएको अपानीमा उल्लेख छ ।
