हरिप्रसाद सापकोटा, बारा ।
राष्ट्रिय जनमोर्चा २ नम्बर प्रदेश समितिको आयोजनामा वीरगञ्जमा विरोध सभा सम्पन्न भएको छ ।
‘गणतन्त्र, राष्ट्रिय स्वाधीनताको रक्षा गरौं, संघीयताको खारेज गरौं!’ भन्ने मूल नारा सहित राजमोले सातै प्रदेशमा आयोजना गरेको विरोध कार्यक्रम अन्तर्गत बुधबार वीरगञ्जमा विरोध सभा सम्पन्न भएको हो ।
सभालाई अखिल नेपाल किसान महासंघका अध्यक्ष भैरवराज रेग्मीले सम्बोधन गर्नुभएको थियो । त्यसक्रममा नेता रेग्मीले एमसीसी नेपालको सार्वभौमिकता विरुद्ध भएकाले यसलाई खारेज गर्नुपर्नेमा जोड दिनुभयो । उहाँले संघीयता नेपालको लागि अफापसिद्ध भइसकेको दाबी पनि गर्नुभयो । संघीयता ढिलो चाँडो खारेज गर्नैपर्ने र जति ढिला भयो, त्यति नै देश र जनताका लागि घात हुने जिकीर गर्नुभयो ।
कार्यक्रमलाई राजमो प्रदेश सदस्य हरिकिशोर महतो, तराई मधेश जनवादी मोर्चाका केन्द्रीय सदस्य अक्षलाल शाह, अखिल नेपाल महिला संघका केन्द्रीय सदस्य सरस्वती कार्की, नेकपा (मसाल)का बारा जिल्ला प्रवक्ता रमेश भट्टराईले सम्बोधन गर्नुभएको थियो ।
२ नम्बर प्रदेशको वीरगञ्ज घण्टाघर अगाडि भएको सभामा प्रदेश कोषाध्यक्ष शेरबहादुर कार्कीले स्वागत गर्नुभएको थियो भने अध्यक्षता राजमो प्रदेश उपाध्यक्ष धर्मानन्द पाध्या र सञ्चालन हरिप्रसाद सापकोटाले गर्नुभएको थियो ।
