जुमान सिंह केसी, प्युठान ।
गौमुखी गाउँपालिका प्युठानले सेटिङमा ठेक्कापट्टा मिलाएको भन्दै तीन राजनैतिक दलले विरोध गरेका छ्न् । नेकपा (एमाले), राष्ट्रिय जनमोर्चा र नेकपा (माओवादी केन्द्र) गौमुखी गाउँ समितिले विज्ञप्ति प्रकाशित गरी विरोध गरेका हुन् ।
गौमुखी गाउँपालिकामा १५ शय्याको अस्पताल निर्माणका लागि ०७७–०७८ मा अस्पताल स्वीकृत भएसँगै भवन निर्माणको लागि प्रक्रिया अगाडि बढेको थियो । गाउँपालिकाले भवन निर्माणका लागि डिपिआर बनाउने र अस्पताल भवनको ठेक्का प्रक्रियामा गाउँपालिकाले मनोमानी, मिलोमतोमा कागजात मिलाएर काम गरेको भन्दै स्थानीय दलहरुले आरोप लागएका छ्न् ।
पटकपटक गाउँपालिकामा उक्त विषयमा छलफल तथा ध्यानाकर्षण गराउँदा समेत गाउँपालिका एकलौटी ढंगले सुनियोजित तरिकाले अगाडि बढेको विज्ञप्तिमा उल्लेख गरिएको छ ।
भवन निर्माणका लागि विद्युतीय बोलपत्र मार्फत गरिएकोमा ४ वटा निर्माण कम्पनी बाट प्रस्ताव आएको गाउँपालिकाले जनाएको छ। तीनवटा निर्माण कम्पनीलाई आर्थिक प्रस्तावमा प्रतिस्पर्धामा सहभागी बनाइएन । ४ करोड भन्दा बढी रकम छोडेर ठेक्का लिन चाहने निर्माण कम्पनीलाई प्राविधिक प्रस्तावमा अयोग्य गराई सुनियोजित ढंगले पाखा लागाइएको विज्ञप्तिमा उल्लेख छ ।
गाउँपालिकाको नेतृत्व तथा प्रमुख प्रशसकीय अधिकृतसँग अपारदर्शी तरिकाले न्युनतम वित्तीय शुसासन तोडेर नीतिगत भ्रष्टाचार गर्ने उदेश्यले आर्थिक प्रस्ताव प्रतिस्पर्धा विहीन गराएर ठेक्का सेटिङमा नलगाउन अनुरोध गर्दा समेत स्थानीय जिम्मेवार राजनैतिक दलको जायज सुझावलाई समेत लत्याउदै गाउँपालिका जबर्जस्त अगाडि बढेकोले आन्दोलन तथा बिरोध गर्न परेको बताएका छ्न् । साथै सचेत नागरिकलाई खबरदारी गर्न समेत अनुरोध गरिएको छ।
उता गौमुखी गाउँपालिकाका प्रमुख प्रशासकीय अधिकृत सुमन पन्थले ४ वटा निर्माण कम्पनीको प्रस्ताव परेकोमा तीन वटाको प्राविधिक मूल्यांकन नपुगेकोले आर्थिक प्रस्तावमा जान नसकिएको बताउनु भएको छ । उहाँले एक मात्र निर्माण कम्पनी योग्य भएकोले आर्थिक प्रस्ताव स्वीकृत गरिएको बताउनुभयो । साथै उहाँले खरिद ऐन २०६४ र नियमावली २०६५ अनुसार प्रक्रियागत ढंगले काम गरेकोले कुनै त्रुटी गाउँपालिकाबाट नभएको समेत दाबी गर्नुभयो ।
१९ करोड ४१ लाख लागत अनुमान गरिएकोमा महादेव खिम्ती आसु मल्लरानी जे भि कम्पनीले १.८ अर्थात् ३४ लाख मात्र रकम छोडेको र १९ करोड ७ लाखमा ठेक्का सम्झौताको लागि गाउँपालिकाले आशयपत्र प्रकाशन गरेको छ ।
