काठमाडौँ । नेपाल प्रज्ञा–प्रतिष्ठानले शत्–प्रतिशत उपलब्धि हासिल गरेको दाबी गरेको छ ।
प्रधानमन्त्री तथा नेपाल प्रज्ञा–प्रतिष्ठानका प्रमुख संरक्षक शेरबहादुर देउवासमक्ष प्रतिष्ठानको आर्थिक वर्ष २०७६/७७ को वार्षिक प्रतिवेदन प्रस्तुत गर्दै यस्तो दावी गरिएको हो ।
प्रधानमन्त्री निवास बालुवाटारमा २०७८ असोज १७ गते आयोजित समारोहमा प्रतिष्ठानका कुलपति गङ्गाप्रसाद उप्रेतीले सो प्रतिवेदन प्रस्तुत गर्नुभयो ।
प्रतिवेदनमा प्रतिष्ठानले सो आवमा ८३ अध्ययन–अनुसन्धान, अनुवाद र ग्रन्थलेखनको काम सम्पन्न गरेको छ ।
त्यस्तै, ५० राष्ट्रिय/अन्तर्राष्ट्रिय गोष्ठी, सम्मेलन, कार्यशाला र प्रवचनका काम भएका छन् भने ग्रन्थ प्रकाशन ८१ ओटा भएको छ । संस्थाले १२ पत्रिकाका २१ अङ्क पनि सो अवधिमा प्रकाशन गरेको छ ।
त्यस्तै, नेपाली बृहत् शब्दकोशको मोबाइल एप निर्माण र सो शब्दकोशलगायत मातृभाषाका शब्दकोषको एकीकृत डाटाबेस पनि निर्माण भएको सदस्य सचिव प्रा. जगत्प्रसाद उपाध्यायले जानकारी दिनुभयो ।
‘कोभिड–१९ पछि सिर्जित बन्दाबन्दीजस्ता प्रतिकूलता भए पनि हामीले शत्–प्रतिशत उपलब्धि हासिल गरेका छौँ’ उहाँले भन्नुभयो ।
समारोहमा प्रतिष्ठानका प्राज्ञसभा सदस्यहरूको सहभागिता रहेको थियो ।
