काठमाडौं । नेकपा (एमाले) बाट विभाजित भएको नेकपा (एकीकृत समाजवादी) ले प्रदेश १ र वागमती प्रदेशमा सरकारलाई दिएको समर्थन फिर्ता लिएको छ । एकीकृत समाजवादीले समर्थन फिर्ता लिएपछि ती दुवै प्रदेशका सरकार अल्पमतमा परेका छन् ।
सरकार अल्पमतमा परेसँगै दुवै प्रदेशमा नयाँ सरकार गठनको चर्चा चलेको छ । प्रदेश १ मा एकीकृत समाजवादीका संसदीय दलका नेता राजेन्द्र राई र वागमतीमा सोही दलका संसदीय दलका नेता राजेन्द्र पाण्डेलाई भावी मुख्यमन्त्रीका रुपमा हेरिएको छ । राई र पाण्डेले आ–आफ्नो प्रदेशमा नयाँ सरकार गठनका लागि पहल थालिसक्नु भएको छ ।
एमालेमा चरम विवाद भइरहँदा माधव नेपालको पक्षमा लागेका तर, नेपालले नयाँ दल खोल्दा साथ नदिएका भीम आचार्य हाल प्रदेश १ को मुख्यमन्त्री हुनुहुन्छ भने उस्तै भूमिकामा रहेकी अष्टलक्ष्मी शाक्यलाई वागमतीको मुख्यमन्त्री बनाइएको थियो । तर, नेपाल नेतृत्वको एकीकृत समाजवादीले दुवै प्रदेशमा सरकारलाई समर्थन नदिने स्पष्ट पारेपछि मुख्यमन्त्री भएको एक महिना नपुग्दै आचार्य र शाक्यको पद धरापमा परेको हो ।
अब दुवै प्रदेशका मुख्यमन्त्रीले कि राजीनामा दिनुपर्छ, कि त एक महिनाभित्र विश्वासको मत लिनुपर्छ । तर, अल्पमतमा परेका दुवै प्रदेश सरकारले विश्वासको मत पाउने सम्भावना भने बर्तमान पाँच दलीय गठबन्धन रहेसम्म सम्भव छैन । त्यसकारण यी दुवै प्रदेशमा नयाँ सरकार गठन हुने छ ।
वागमतीमा सरकार गठन प्रक्रिया सुरु भइसक्यो : पाण्डे
नेकपा (एकीकृत समाजवादी) का वागमती प्रदेश संसदीय दलका नेता राजेन्द्र पाण्डेले मुख्यमन्त्री अष्टमन्त्री शाक्यलाई दिएको समर्थन फिर्ता लिइसकेकाले अब तीन दलको साझा उम्मेदवारका रुपमा आफू अघि बढेको बताउनुभएको छ । उहाँले मुख्यमन्त्री शाक्यसँग राजीनामा दिने वा अविश्वास प्रस्ताव सामना गर्ने बाहेक अरु विकल्प नभएको बताउनुभयो।
नेपाली रेडियो नेटवर्कको कार्यक्रम नेपाली बहसमा पाण्डेले भन्नुभयो, ‘हामीले मुख्यमन्त्री अष्टमन्त्री शाक्यलाई दिएको समर्थन फिर्ता लिइसकेका छौं । हामीले समर्थन फिर्ता लिएपछि एमालेको एकल बहुमत घटेर ४३ जनामा झरेको छ । उहाँले राजीनामा नदिए ३० दिनभित्र विश्वासको मत लिनुपर्ने बाध्यकारी व्यवस्था छ । राजीनामा दिने या विश्वासको मत लिने उहाँको कुरा हो । नेपाली कांग्रेस, नेकपा माओवादी केन्द्र र हामी मिलेर साझा उम्मेदवार तय गर्छौं ।’
विगतमा अष्टलक्ष्मी शाक्यलाई मुख्यमन्त्री बनाउन आफू लागे पनि केपी ओलीको शरणमा परेकाले समर्थन फिर्ता लिएको पाण्डेको भनाई थियो । उहाँले गठबन्धनसँग ६० सांसद रहेको दाबी पनि गर्नुभयो ।
‘हामी नेपाली कांग्रेसका २३, माओवादी केन्द्रका २३, एकीकृत समाजजादीका १३ र एक स्वतन्त्र सांसद गरी ६० जना पुग्छौैं । ५५ भए बहुमत पुग्छ । उहाँहरुको साना दल मिलाउँदा खेरि पनि बहुमत पुग्दैन । पाँच जना कहीँबाट पुर्याउन सक्ने अवस्था छैन’ उहाँले भन्नुभयो ।
प्रदेश १ मा छलफलको जिम्मा राजेन्द्र र राजनलाई
यता, प्रदेश १ मा पनि नेकपा (एकीकृत समाजवादी) सरकारको समर्थन फिर्ता लिएको छ । समर्थन फिर्ता लिएसँगै एकीकृत समाजवादीका प्रदेश संसदीय दलका नेता राजेन्द्र राई र राजन राई रहेको दुई सदस्यीय वार्ता टोली गठन गरी प्रदेशसभामा प्रतिनिधित्व गर्ने विभिन्न दलका नेतासँग छलफल सुरु गरेको छ ।
९२ सदस्यीय प्रदेशसभामा एमालेका ४१, कांग्रेसका २१, माओवादी केन्द्रका १५, एकीकृत समाजवादीका १०, जनता समाजवादी पार्टीका ३, संघीय लोकतान्त्रिक राष्ट्रिय मञ्च र राप्रपाको १÷१ जना प्रदेश सांसद छन् ।
