काठमाडौं । पूर्वाधारविद् डा. सूर्यराज आचार्यले अमेरिकी सहयोग परियोजना ‘एमसीसी’ सम्झौता गर्ने सन्दर्भमा दुई ठूला पार्टी नेपाली कांग्रेस र नेकपा (एमाले) ले देशप्रति नै लापरवाही गरेको बताउनुभएको छ ।
आइतबार रिपोर्टस क्लबले आयोजना गरेको कार्यक्रममा उहाँले दुवै ठूला राजनीतिक दलहरुले एमसीसीको उत्थान, सम्झौता, सही गर्दा दुवै पार्टीले सोच विचार र अध्ययन नगरी लापरवाही गरेको बताउनुभयो । उहाँले एमसीसी जस्ताको तस्तै पास गर्न नहुने उल्लेख गर्नुभयो ।
पूर्वाधारविद् डा. आचार्यले भन्नुभयो, ‘एमसीसी अहिले जस्तो छ त्यस्तै रुपमा पास गर्नुहुँदैन भन्ने मेरो कुरा हो । यो म कुनै नेताको विचार सुनेर, एजेण्डा हेरेर भनेको होइन, मसँग वस्तुगत आधार छन्, दर्जनौँ डकुमेण्टहरु छन्, त्यसको सूचनाहरु छन् । जुन कुरा नेताहरु जनतासामु चुहाउन चाहँदैनन्, अड्कलि अड्कलि सूचना दिन्छन् ।
देशलाई नेपालका दुई ठूला राजनीतिक दलहरुले ठूलो अन्याय गरेका छन्, एउटा एमसीसीको उत्थान जसरी गरियो, गर्न प्रेरित गरियो र अर्को सहज गर्न र गराउने वातावरण मिलाइयो, त्यसमा लापरवाही भएको छ। सम्झौता वार्तामा पनि लापरवाही भएको छ ।’
डा. आचार्यले एमसीसीकी उपाध्यक्ष फातिमा सुमार नेपाल आएर शीर्ष नेताहरुलाई भेट्दा नेताहरुले आफ्नो देशको आन्तरिक राजनीतिका पाटोहरुलाई खुलाउनु नहुने बताउनुभयो । उहाँले अमेरिका जस्तो शक्तिशाली देशले सहयोग गर्ने कुरा बिना कुनै स्वार्थ हुन नसक्ने पनि बताउनुभयो ।
