जीवन शाही, वीरेन्द्रनगर ।
माथिल्लो कर्णाली बचाऔँ राष्ट्रिय अभियानका अध्यक्ष भरतबहादुर शाहीले राष्ट्रघाती एमसिसी सम्झौता हुन नदिनका लागि जनआन्दोलन गर्नुपर्ने बताउनु भएको छ ।
षड्यन्त्र र दमनको सहाराले राष्ट्रियताको अभियान नरोकिने बताउँदै उहाँले यस्तो रवैयाले राष्ट्रियताको रक्षा गर्ने आन्दोलन नरोकिने बताउनुभयो ।
२०७८ भदौ २४ गते सुर्खेतको सदरमुकाम वीरेन्द्रनगरको वीरेन्द्रचोकमा अभियानले आयोजना गरेको एमसिसी विरुद्धको कार्यक्रममा प्रमुख अतिथिको आसनबाट सम्बोधन गर्दै उहाँले यस्तो बताउनुभएको हो ।
सम्बोधनको क्रममा उहाँले एमसिसीकी उपाध्यक्ष फातिमा सुमार र सहायक उपाध्यक्ष जोनाथन बु्रक्सको भ्रमण प्रायोजित भएको आरोप लगाउनुभयो । उहाँले आम देशभक्त नागरिक एक भएर यो एमसिसी खारेज गर्नुपर्ने आवश्यकतामा जोड दिनुभयो ।
सो अवसरमा उहाँले राष्ट्रघाती माथिल्लो कर्णालीको समय फेरि थप गर्ने तयारी भइरहेकाले त्यसलाई रोक्न पनि आन्दोलनको आवश्यकता रहेको बताउनुभयो ।
कार्यक्रममा राष्ट्रिय जनमोर्चाका केन्द्रीय वैकल्पिक सदस्य कमलविक्रम शाहीले अभियानको राष्ट्रियताको आन्दोलनमा राजमोको पूर्ण समर्थन रहेको बताउनुभयो ।
अखिल नेपाल राष्ट्रिय उद्योग व्यापार सङ्घका केन्द्रीय सदस्य कविराज खत्रीले समेत सो कार्यक्रममा सम्बोधन गर्नुभएको थियो ।
विरोध कार्यक्रमको सञ्चालन अभियानका महासचिव पूर्णबहादुर शाहीले गर्नुभएको थियो ।
कार्यक्रमपूर्व जुलुस प्रदर्शन गरिएको थियो । वीरेन्द्रचोकबाट नाराजुलुससहित बजार परिक्रमा गरेको सो जुलुस घण्टाघरनजिक पुगेर सभामा परिणत भएको थियो ।
