धनवीर पुनमगर, नयाँदिल्ली ।
राष्ट्रिय जनमोर्चाका नेता आनन्द शर्माले एमसिसी अमेरिकी साम्राज्यवादको विषालु परियोजना भएको बताउनुभएको छ ।
मूल प्रवाह अखिल भारत नेपाली एकता समाज दक्षिण भारत क्षेत्रीय समितिको आयोजनामा एमसिसी विरुद्ध भर्चुअल सभालाई सम्बोधन गर्ने क्रममा शर्माले सो धारणा राख्नुभएको हो ।
उहाँले अमेरिकी साम्राज्यवादले विभिन्न देशको सार्वभौमिकतामाथि आधिपत्य जन्माउनका लागि गरिएको षड्यन्त्रको एउटा कडी एमसिसी भएको दाबी गर्नुभयो ।
‘एमसिसी परियोजना लागु गर्दा कुनै विषय कुरा बाझियो भने नेपालको संविधान निरस्त हुने तर एमसिसीका प्रावधान लागु हुँदा नेपालको सार्वभौमिकता नै समाप्त हुन्छ’ शर्माले भन्नुभयो– ‘एमसिसी हिन्दप्रशान्त रणनीतिअन्तर्गत आएको छ । हिन्दप्रसान्त रणनीतिको उद्देश्य अकेरिकी सैन्यसुरक्षा कार्यान्वयन गर्नु हो ।’
त्यस्तै, एमसिसी नेपालको बौद्धिक सम्पत्तिमाथि आधिपत्य जमाउने उद्देश्यसहित आएको शर्माले बताउनुभयो ।
एमसिसीले नेपाललाई अमेरिकी साम्राज्यवादको रणमैदान बनाउने भएकोले यसलाई सम्पूर्ण देशभक्त शक्तिहरूले विरोध गर्दै कार्यान्वयन हुन नदिनुपर्ने शर्माको थप भनाइ थियो ।
कार्यक्रममा क्षेत्रीयका सचिव जनकराज पौडेलले अवधारणा पत्र प्रस्तुत गर्नुभएको थियो ।
सो अवसरमा मन्तव्य राख्दै गण्डकी प्रदेशकी सांसद पियारी थापाले अमेरिकी साम्राज्यवादले नेपाललाई सामरिक युद्धमा धकेल्ने चाहेको बताउनुभयो ।
‘एमसिसीअन्तर्गत शान्ति स्थापना गर्ने बहानामा सैन्य अखडा बनाउने काम हुने छ’ थापाले भन्नुभयो ।
उहाँले अमेरिकी साम्राज्यवादको कलो खानेहरूलाई असफल पार्नुपर्ने बताउनुभयो ।
मूल प्रवाह अखिल भारत नेपाली एकता समाजका अध्यक्ष दुर्गा बहादुर केसीले भारतका विभन्न सहरमा एमसिसी विरुद्ध मूल प्रवाहका कार्यकर्ताले आवाज उठाएको बताउनुभयो ।
‘हामीले केवल २४ घण्टाको अवधिमा भारतका करिब ९७ सहरमा एमसिसी विरुद्ध सभा गरेका छौँ’ केसीले भन्नुभयो ।
कार्यक्रममा केन्द्रीय उपाध्यक्ष प्रेम पौडेल, केन्द्रीय सचिव त्रिभुवन भट्टराई, केन्द्रीय सदस्य मदन शर्मा, भगवती कुँवर, केन्द्रीय सल्लाहकार बालकृष्ण गायक, अन्तर्राष्ट्रिय नेपाली एकता समाजका कोषाध्यक्ष शक्तमान बुढाले पनि मन्तव्य दिनुभएको थियो ।
सो अवसरमा गोकुल गायक, धरम पहरी, लोकेन्द्र पौडेल, जनक बिसी, चन्द्रप्रसाद पौडेल र मनोज जिसीले मन्तव्यसहित ऐक्यबद्वता जनाउनुभएको थियो ।
केन्द्रीय कोषाध्यक्ष केबी थापा, सदस्य चोबनाथ शर्मा, गिरीराज परियार, ठाकुर केसी, महोराज चालिसे, केन्द्रीय प्रतिनिधि चन्द्रकान्त शर्मा, केन्द्रीय सदस्य तथा नेपाली समाचार पत्रिकाका सहसम्पादक धनवीर पुन, मलेसिया नेपाली एकता समाजका गोविन्द विष्ट, कोरिया नेपाली एकता समाजका विष्णु पुनले अतिथि आसन ग्रहण गर्नुभएको थियो ।
कार्यक्रम क्षेत्रीय अध्यक्ष चन्द्रबहादुर थापाको अध्यक्षता तथा क्षेत्रीय सहसचिव धर्मराज शर्माको सञ्चालनमा अगाडि बडेको थियो ।
क्षेत्रीय उपाध्यक्ष दशरथ विकले उपस्थिति जनसमुदायलाई स्वागत तथा देविराम केसीले धन्यवाद मन्तव्य राख्नुभएको थियो ।
