काठमाडौं । राष्ट्रिय जनमोर्चाले चालकको लापरवाहीका कारण अत्याधिक सवारी दुर्घटना हुने गरेको भन्दै चालकलाई सचेत पार्नुपर्ने आवश्यकतामा जोड दिएको छ ।

हालै दाङ जिल्लाको सिस्नेखोलामा बाढीले कार बगाउँदा चार जना महिलाको मृत्यु भएको थियो । चालकको लापरवाहीका कारण सिस्नेखोलाको दुखद घटना घटेको राजमोले जनाएको छ ।

राजमो उपाध्यक्ष दुर्गा पौडेलले शनिबार प्रेशित गर्नुभएको विज्ञप्तिमा दाङको घटनासहित लापरवाहीपूर्ण ढंगले गाडी चलाउने चालकलाई कारबाही गर्न र चालकहरुलाई सचेत पार्न आग्रह गर्नुभएको छ ।

विज्ञप्तिमा भनिएको छ,
दाङ जिल्लाको घोराही–तुलसीपुर खण्डको सिस्ने खोलामा बाढीले कार बगाउँदा ४ जना महिलाको मृत्यु भएको छ । राति करिब ११ बजेतिर बाढीले कार बगाएको थियो । दुर्घटनामा परी घोराही उपमहानगरपालिका १३ की रीतामाया पुन, सुशीला श्रेष्ठ, घोराही १५ की राधा कुँवर र विमला केसीको मृत्यु भएको छ भने कार चालक नरबहादुर पुन गम्भीर घाइते भएका छन् । मृतकहरुप्रति हार्दिक श्रद्धाञ्जली अर्पण गर्दै शोकसन्तप्त परिवारप्रति समवेदना व्यक्त गर्दछौं ।

मध्यरातमा आएको ठूलो बाढीमा गाडी हाल्नु चालकको गम्भीर लापरवाही देखिन्छ । त्यही लापरवाहीले चार जना महिलाको ज्यान जानु ठूलो क्षति हो । चालकको लापरवाहीको कारण देशमा धेरै दुर्घटना हुने गरेको देखिन्छ । विभिन्न समयका छानविन र अध्ययन प्रतिवेदनले पनि दुर्घटना हुनुको प्रमुख कारण चालककको लापरवाहीहो भन्ने पुष्टि भएका छन् । दाङको घटना पनि निकै लापरवाहीपूर्ण देखिन्छ ।

दाङमा भएको दुर्घटनाको छानविन गरी दोषीउपर कडा कारवाही गर्न माग गर्दछौं । देशभर चालकको लापरवाहीले हुने दुर्घटना रोक्न लाखौं चालकहरुलाई लगातार सचेत गराउन, लापरवाहीपूर्ण सवारी चलाउने चालकहरुलाई कडा कारवाही गर्नुपर्ने आवश्यकतामा जोड दिन चाहन्छौ ।

२०७८ भदौ १८ गते
दुर्गा पौडेल
उपाध्यक्ष तथा प्रवक्ता