डबल बोगटी, धनगढी ।
राष्ट्रिय जनमोर्चाले पार्टी विरोधी गतिविधिमा संलग्न रहेको आरोपमा सुदूरपश्चिमका पाँच नेतालाई कारबाही गरेको छ । उनीहरूलाई पार्टीका सबै जिम्मेवारीबाट हटाउनुका साथै साधारण सदस्यतासमेत नरहने गरी अनिश्चितकालका लागि निश्कासित गरिएको राजमोले जनाएको छ ।
केन्द्रीय सदस्य लालबहादुर जाग्री, केन्द्रीय सल्लाहकार लोकेन्द्र लम्साल, केन्द्रीय पार्षदहरू लक्षीराम आचार्य (कैलाली), केशवनाथ योगी (डोटी) र गोविन्द विक (कञ्चनपुर) लाई कारबाही गरेको राजमो सुदूरपश्चिम प्रदेश समितिका अध्यक्ष नन्दराज भट्टद्वारा जारी विज्ञप्तिमा जनाइएको छ ।
शुक्रबार धनगढीमा पत्रकार सम्मेलन गरी राष्ट्रिय जनमोर्चाले फुटपरस्त गतिविधिमा संलग्न रहेको भन्दै ती पाँच नेतालाई कारबाही गरिएको स्पष्ट पारेको हो । कार्यक्रममा राष्ट्रिय जनमोर्चाका महासचिव मनोज भट्टले देशको समसामयिक राजनीतिका विषयमा पार्टीको धारणा राख्नुभएको थियो ।
पत्रकार सम्मेलनमा राजमो प्रदेश अध्यक्ष नन्दराज भट्ट, अखिल नेपाल किसान संघका केन्द्रीय सदस्य हरिकृष्ण पाण्डे, राजमो कञ्चनपुरका अध्यक्ष रामबहादुर कार्की लगायत नेताहरू सहभागि हुनुहुन्थ्यो ।
यही भदौ ८ र ९ गते सुदूरपश्चिममा राष्ट्रिय जनमोर्चाको नाममा केही व्यक्तिहरुले भेला गरी समानान्तर समिति बनाएका थिए । सो कार्यमा संलग्नलाई कारबाही गर्नुका साथै राजमोले भ्रमबस पार्टी विरोधी समूहमा सामेल नेता कार्यकर्ताहरुलाई पार्टीमा फर्कन पनि आग्रह गरेको छ ।
