काठमाडौं । राष्ट्रिय जनमोर्चाले सुदूरपश्चिममा बेग्लै भेला गरेको फुटपरस्त तत्वको भ्रममा नपर्न आग्रह गरेको छ । मंगलबार एक वक्तव्य प्रकाशित गरी उपाध्यक्ष दुर्गा पौडेलले अनुशासनहीन तत्वले कतिपय इमान्दार कार्यकर्तालाई समेत भ्रममा पारेर समानान्तर समितिमा राखेको बताउनुभएको छ ।

उहाँले वक्तव्यमा सो समूहको भ्रममा परेर पार्टीविरुद्ध गएका पार्टी सदस्यलाई भ्रममुक्त भइ पार्टीमै फर्कन आग्रह गर्नुभएको छ ।

यस्तै, उहाँले फुटपरस्त तत्वको माओवादीसँग साँठगाँठ रहेको भन्ने समाचारप्रति पनि ध्यानाकर्षण भएको जनाउँदै अहिले नै आफ्नो पार्टी त्यो निष्कर्षमा पुगिनसकेको र त्यसबारे छानबिन गरिरहेको बताउनुभएको छ ।

यस्तो छ वक्तव्य :
‘सुदूरपश्चिममा भएको फुटपरस्त गतिविधि तथा त्यससित सम्बन्धित कतिपय समाचारहरुबारे हाम्रो पार्टीको दृष्टिकोण स्पष्ट गर्नको लागि यो वक्तव्य जारी गरिएको छ ।

१.सुदूरपश्चिममा राष्ट्रिय जनमोर्चाको बेग्लै प्रदेश समितिको गठन गर्ने फुटपरस्त गतिविधिहरु माथि हाम्रो पार्टीको ध्यान आकर्षित भएको छ । बाहिरबाट हेर्दा त्यो गतिविधि नयाँ र आकस्मिक जस्तो देखिन्छ । तर वास्तविकता यो हो कि हाम्रो पार्टीमा पहिलेदेखि नै अनुशासन बिहीन र फुटपरस्त विचारहरु देखापर्दै आएका थिए । त्यसको अर्थ पार्टीमा आएका सबै भिन्न विचारहरुलाई हामीले अनुशासन विहीन र फुट परस्त भन्दैनौँ । पार्टीका सबै साथीहरुलाई आफ्ना मतभेदहरु प्रकट गर्ने अधिकार हुन्छ र त्यस्ता भिन्न विचारहरुलाई हामीले सम्मान पनि गर्दछौँ ।

त्यस्ता मतभेदहरु भएपनि प्रथम, त्यस प्रकारका सबै मतभेदहरुलाई पार्टीको विधान र अनुशासन अन्तर्गत रहेर नै प्रकट गर्नुपर्दछ । द्वितीय, मतभेद भएपनि एकपल्ट बहुमतद्वारा निर्णय भएपछि तिनीहरुलाई पालना र कार्यान्वयन गर्नु सबै पार्टी सदस्यहरुको दायित्व हुन्छ ।

पार्टीमा मतभेद राख्ने इमान्दार र अनुशासित साथीहरुले सँधै त्यही प्रकारको तरिका अपनाउने गर्नुभएको छ । तर केही साथीहरुले पहिलेदेखि नै आफ्ना मतभेदहरुलाई अनुशासन विहीन वा गुटबन्दीका रुपमा अगाडि बढाउने र त्यसका आधारमा पार्टीमा फुट पार्ने प्रयत्न गर्दै आउनुभएको थियो । अहिले सुदूरपश्चिममा फुटेर गएका कतिपय साथीहरुको पनि पहिलेदेखि नै त्यही प्रकारको भूमिका रहँदै आएको थियो । हामीले कैयौँपल्ट आलोचना गर्ने, पार्टीभित्र सामान्य अनुशासनको कारबाही गर्ने र त्यसरी सुधार्ने प्रयत्न गर्दै आएका थियौँ ।

त्यसरी धेरै साथीहरुले आफूलाई सुधारेर पार्टीमा अनुशासित र सक्रिय भएर काम पनि गर्नुभएको छ । तर केही साथीहरुको त्यसरी सुधार हुन सकेन र उहाँहरुले आफ्ना पहिलेदेखिका अनुशासन विहीन र गुटबन्दीजन्य कार्यहरुलाई फुटपरस्त गतिविधिको रुपमा बाहिर ल्याउनु भयो । त्यसो गर्दा उहाँहरुले कतिपय इमान्दार र अनुशासित साथीहरुलाई पनि भ्रम पारेर आफ्ना साथमा फुटाएर लगेको कुरा पनि सत्य हो ।

हामीले आशा गर्दछौँ, त्यसप्रकारका इमान्दार साथीहरु भ्रमबाट मुक्त भएर पार्टीमा फर्कनु हुनेछ र त्यसका लागि हामीले उहाँहरुसित आग्रह पनि गर्दछौँ । जुन साथीहरुले सनियत नै हाम्रो पार्टी, राष्ट्रिय जनमोर्चालाई फुटाउने काम गर्नुभएको छ, उहाँहरुको फुटपरस्त गतिविधिमा कुनै सैद्धान्तिक र राजनीतिक औचित्यता छैन । उहाँहरुले निराधार र व्यक्तिगत आरोपहरु लगाएर नै पार्टीमा फुट पार्ने प्रयत्न गर्नुभएको छ । त्यसैले उहाँहरु छिटै नाङ्गीएर जानुहुनेछ भन्ने हामीलाई विश्वास छ ।

२.सुदूरपश्चिमको फुटपरस्त गतिविधिका सन्दर्भमा कतिपय अनलाइन वा पत्र–पत्रिकाहरुले त्यो फुट नेकपा (माओवादी केन्द्र)मा मिल्न जानको लागि नै भएको भन्ने समाचारहरु पनि प्रकाशित गरेका छन् । निश्चयनै कतिपय सुत्रहरुबाट त्यस प्रकारका समाचारहरु आएका पनि छन् । त्यसबारे हाम्रो पार्टीमा छलफल पनि भएको थियो । तर त्यो छलफल पछि हाम्रो पार्टी यो निश्कर्षमा पुगेको थियो कि उनीहरु माओवादीमा जाने प्रकारका समाचारहरु आएको भए पनि त्यस प्रकारका समाचारहरुको आधिकारीक रुपमा पुष्टी भएको थिएन ।

त्यो अवस्थामा फुटपरस्त तत्वहरुमाथि त्यस प्रकारका आरोपहरु लगाउनु सही हुँदैन भन्ने नै हाम्रो पार्टीको निष्कर्ष थियो । कतिपय अनलाइन वा पत्र–पत्रिकाहरुले त्यस प्रकारका अपुष्ट समाचारहरु बाहिर ल्याएकोप्रति हाम्रो ध्यानाकर्षित भएको छ । हामीले यो स्पष्ट गर्न चाहन्छौँ कि, कतिपय सुत्रहरुबाट त्यस प्रकारका समाचारहरु आएको भएपनि हाम्रो पार्टी आधिकारीक रुपमा त्यस प्रकारको कुनै निष्कर्षमा पुगेको छैन ।

यदि उनीहरुको माओवादी वा अन्य कुनै पक्षसित सौदावाजी वा साँठगाँठ भएको भए आउने दिनहरुमा त्यो कुरा आफै प्रष्ट हुनेछ । तर हामीले अहिले सुदुरपश्चिममा हाम्रो पार्टीबाट फुटेर जाने फुटपरस्त तत्वहरुबारे त्यस प्रकारको धारणा नबनाएको कुरा पनि जानकारी गराउन चाहन्छौँ ।’
मितिः २०७८–०५–१५ गते
दुर्गा पौडेल
उपाध्यक्ष तथा प्रवक्ता