हेम बिजी ##
भत्काउनै खोजेका थिए सिङ्गो घर
फुटाल्नै खोजेका थिए भित्ता
जग खनेर
खम्बा भाँचेर
छाना तानेर
कठैबरा
भत्काउने बुता नचेलेर
भागेछन् फुटपरस्त भगौटे ।

तर
सिङ्गो घर भत्काउन नसके पनि
जग हल्लाउन नसके पनि
एक दुई
खम्बामा धमिरा उठाएछन्
एक दुई ठाउँ
छानामा प्वाल पारेछन्
र भित्ताका
एक दुई ढुङ्गा फुटाएछन्
एक दुई माटाका डल्ला झारेछन् ।

त्यसैले
यति बेला हामी
धमिरा उठाएका खम्बा फेर्दै छौं
प्वाल पारेका छाना टाल्दै छौं
एक दुई वटा
फुटाएका ढुङ्गा
र झारेका माटा डल्ला
मिलाउँदै छौँ
अर्थात
यति बेला हामी
घर मजबुत बनाउँदै छौँ
घर पुनर्गठन गर्दै छौँ ।