काठमाडौँ । नेकपा (मसाल) १ नं. प्रदेशका प्रवक्ता योगेन्द्र ढकालले आफू प्रदेश प्रवक्ताको जिम्मेवारीमा कायमै रहेको प्रष्टीकरण दिनुभएको छ ।
कतिपय व्यक्तिले सामाजिक सन्जालमा प्रवक्ता ढकालसहित १२ जनालाई पार्टीबाट कारबाही गरी जिम्मेवारीविहीन बनाइएको सामग्री सार्वजनिक भएपछि उहाँको यस्तो प्रष्टीकरण आएको हो ।
२०७८ भदौ ११ गते प्रवक्ता ढकालले सार्वजनिक गर्नुभएको प्रष्टीकरणमा कम्युनिस्ट पार्टीमा फरकमत वा असन्तुष्टि सम्बोधन गर्ने निश्चित विधिप्रक्रिया हुने बताउँदै सम्पूर्ण सदस्य र शुभचिन्तकलाई सोहीअनुसार प्रस्तुत हुन आग्रह गरिएको छ ।
यस्तो प्रवक्ता ढकालको प्रष्टीकरण
“सामाजिक सन्जालमा १ नं. प्रदेशका एक जना कमरेडले कथित अल्पमत भएका कारण कारबाहीमा परेको वा जिम्मेवारीविहीन बनाइएको भन्दै यी साथीहरूको नाम दिएका छन् : १) योगेन्द्र ढकाल, २) सुरेन्द्र भण्डारी, ३) बालकृष्ण सुवेदी, ४) अबिचन्द्र भण्डारी, ५) सन्तोष राई, ७) पुरुषोत्तम काफ्ले, ८) आशिस जबेगु, ९) शिव फुँयाल, १०) पूर्ण सर्वहारा, ११) विशाल राई, १२) ब्रतकुमार राई । यी नाममध्ये आशिस जबेगु, शिव फुयाँल र पुरुषोत्तम काफ्ले अन्य पार्टीमा सामेल हुन पुगेका छन् । तर अन्य साथीहरू नेकपा (मसाल) सम्बद्ध वैधानिक मोर्चा तथा जनवर्गीय सङ्गठनका विभिन्न जिम्मेवारीमा क्रियाशील हुनुहुन्छ । उहाँहरूमाथि कुनै पनि प्रकारको कारबाही भएको छैन । म (योगेन्द्र ढकाल) स्वयम् नेकपा (मसाल) १ नं. प्रदेश प्रवक्ताको जिम्मेवारीमा छु ।
कम्युनिस्ट पार्टीमा फरकमत वा असन्तुष्टिलाई सम्बोधन गर्न जनवादी केन्द्रियताको आलोकमा निश्चित विधिप्रक्रिया हुन्छन् । कुनै पनि सदस्यले सोही विधिअन्तर्गत रहेर आफ्ना फरकमत वा असन्तुष्टि दर्ता गरेर प्रक्रियामा लैजान सक्छ । त्यसका विपरीत असम्बन्धित ठाउँमा वा सार्वजनिक रूपले सामाजिक सन्जालमा आफ्ना फरकमत वा असन्तुष्टि व्यक्त गर्नु अनुशासनविहीन कार्य हो । त्यसप्रति सजग र सतर्क रहन हामी सम्पूर्ण सदस्य र शुभचिन्तकसित आग्रह गर्दछौँ ।”
