महेश रिजाल, भालुवाङ ।
दाङ राप्ती गाउँपालिका वडा नं. २ को नवनिर्मित वडा नं. २ को भवन उद्घाटन प्रमुख अतिथि एवम् राप्ती गाउपालिकाका अध्यक्ष नुमानन्द सुवेदीले २०७८ भदौ ८ गते भव्य कार्यक्रमका साथ गर्नुभयो ।
गत आव २०७७/७८ मा निर्माण सम्पन्न भएको उक्त भवनको कुल लागत ८४ लाख १६ हजार ३ सय ३५ रुपियाँ रहेको छ । अढाइतले उक्त भवनमा सभाहल १, २ स्टोर कक्ष र ४ वटा बैठक कक्षसमेत कुल आठकोठे रहेको उक्त भवनको निर्माण कार्य आरजी निर्माण सेवा घोराही दाङले गरेको थियो ।
राप्ती गाउँपालिका वडा नं. २ का वडाध्यक्ष जगत्बहादुर थापाको अध्यक्षतामा सम्पन्न भवन उद्घाटन समारोहलाई प्रमुख अतिथि सुवेदी, विशिष्ट अतिथि राप्ती गापा उपाध्यक्ष जगदम्बाकुमारी चौधरी, प्रमुख प्रशासकीय अधिकृत शाभाराम रिजाल, वडा नं. ३ का अध्यक्ष चन्दर चौधरी, नेपाली काङ्ग्रेसका प्रतिनिधि द्रोणप्रसाद भुसाल, माओवादी–केन्द्रका प्रतिनिधि धर्मराज अधिकारी, राष्ट्रिय जनमोर्चाका रमेशमान गुरुङलगायतले मन्तव्य राख्नुभएको थियो ।
सोही समारोहमा गत आव २०७७/७८ को रु. २ करोड १२ लाख ७५ हजार ३ सय ६० रुपियाँमा सम्पन्न भएका योजनाको सार्वजनिकीकरण र चालु आव २०७८/७९ को कुल १ करोड २१ लाख ५० हजारको बजेट समेत सार्वजनिकीकरण गरिएको थियो ।
वडासदस्य वसन्त नेपालीको स्वागत मन्तब्यबाट सुरु भएको कार्यक्रमको सञ्चालन वडासचिव सीता भण्डारीले गर्नुभएको थियो ।
