काठमाडौं । नेकपा एमालेमा भएको विभाजनको असर वागमती प्रदेशमा परेको छ । माधव नेपाल पक्षमा रहेर मध्यमार्गी भूमिकामा रहेकी अष्टलक्ष्मी शाक्यलाई नेपालको नयाँ पार्टीमा जानबाट रोक्न एमालेले रातारात मुख्यमन्त्री बनायो ।
फुटको घटनाले अष्टलक्ष्मीलाई मुख्यमन्त्री पद मिले पनि सरकारको आयु भने धेरै लामो देखिँदैन । माधवकुमार नेपालको साथ पाएर मुख्यमन्त्री बनेकी शाक्य केपी ओलीको पार्टीमा खुलेपछि नेपालको साथ नपाउने पक्का छ ।
नवगठित नेकपा (एकीकृत समाजवादी) का नेता राजेन्द्र पाण्डेले मुख्यमन्त्री शाक्य अल्पमतमा परेको दाबी गर्नुभएको छ । उहाँले एमालेमै बस्ने हो भने शाक्यले विश्वासको मत नपाउने बताउनुभयो ।
‘वागमती प्रदेशमा एमालेका ५६ जना थियौं, ५५ भए बहुमत पुग्थ्यो । अब २१ दिनभित्र सांसदहरुले पार्टी रोज्न पाउँछन्’ पाण्डेले भन्नुभयो, ‘त्यसैले अष्टजी अल्पमतमा परिसक्नुभयो । उहाँले हामीसँग आए विश्वासको मत दिने हो । आउनुभएन भने उहाँको पद धरापमा पर्छ ।’
मुख्यमन्त्री शाक्यले नियुक्त भएको ३० दिनभित्र विश्वासको मत लिनुपर्नेछ । एमालेको एकल बहुमत भएकाले सबैले पक्षमा मतदान गरेमा शाक्य विश्वासको मत लिन सफल भई आगामी निर्वाचनसम्म मुख्यमन्त्री रहनुहुने छ । तर, वागमती प्रदेशसभामा एमालेका ५६ सांसदमध्ये माधव नेपाल पक्षमा रहेको सांसदको साथ नपाए नयाँ परिस्थिति विकास हुन्छ । बहुमतको सरकार गठनका लागि प्रदेश प्रमुखले आव्हान गर्न सक्छन् ।
वागमतीमा ११० सांसदमध्ये एमालेका ५६ मध्ये विगतमा माधव नेपालको पक्षमा २२ जना थिए । अष्टलक्ष्मी शाक्यले साथ छाडेपछि यो संख्या घटेर १० भन्दा कम रहेको बुझिएको छ । विभाजित पार्टीमा १० भन्दा कम सांसद गएकाले गठबन्धनको पनि बहुमत पुग्दैन ।
यद्यपी प्रदेशमा नेपाल समूहका २१ जना सदस्यमध्ये ६० प्रतिशतभन्दा बढी सांसद एकीकृत समाजवादीको पक्षमा उभिएको नेता पाण्डेको दाबी छ ।
बहुमतको सरकार गठनका लागि आवश्यक ५६ सांसदका लागि माओवादी केन्द्रको २३ र नेपाली कांग्रेसको २२ जनामा थप ११ जना आवश्यक पर्छ । माधव नेपाल समूहमा १० भन्दा कम छ । त्यसबाहेक विवेकशील साझा पार्टीका ३, राप्रपाका २, नेपाल मजदूर किसान पार्टीका २ र स्वतन्त्र १ सांसद छन् । गठबन्धनलाई राप्रपा र नेपकिपाको साथ मिल्ने सम्भावना लगभग छैन । विवेकशीलले साथ दिँदा माधव नेपाल पक्षमा कम्तिमा ८ जना हुनुपर्छ ।
वागमतीमा कसैको पनि बहुमत नपुग्ने अवस्था आउन सक्छ । यस्तो अवस्थामा सबैभन्दा ठूलो दलको संसदीय दलको नेताको हैसियतले अष्टलक्ष्मी शाक्य नै मुख्यमन्त्री रहने, फेरि बहुमतको सरकार गठनको आव्हान हुने र त्यो बन्न नसके मध्यावधि चुनावमा जान सक्छ ।
