काठमाडौँ । बागमती प्रदेशमा प्रगतिशील साहित्यको विगत र वर्तमान अवस्थाबारे प्रगतिशील लेखक सङ्घको सतचालिसौँ परिसंवाद सम्पन्न भएको छ ।
केन्द्रीय अध्यक्ष प्राडा जीवेन्द्र देव गिरीको प्रमुख आतिथ्यतामा २०७८ भदौ ४ गते भर्चुअल माध्यमबाट सो कार्यक्रम सम्पन्न भएको हो ।
कार्यक्रममा डा. रजनी ढकालले “बागमती प्रदेशको प्रगतिशील साहित्य : विगत र वर्तमान” शीर्षकमा लिखित कार्यपत्र प्रस्तुत गर्नुभएको थियो ।
डा. ढकालले कार्यपत्रलाई मूलतः छ भागमा विस्तार गरी विषयवस्तु प्रस्तुत गर्नुभएको थियो । ती छ भाग थिए– १. प्रगतिशील लेखनको परिचय, २. प्रस्तुतिको सीमाङ्कन, ३. विगत र वर्तमानको समयगत सन्दर्भ, ४. विगतकाल : प्रगतिशील साहित्यकार र तिनका रचना, ५. वर्तमान कालका साहित्यकार र रचना र ६. बागमती प्रदेशका प्रगतिशील साहित्यको समग्र प्रवृत्ति ।
लिखित प्रस्तुतिमा उहाँले बागमती प्रदेशका १३ वटै जिल्लाको बेग्ला बेग्लै, तर सङ्क्षिप्त व्याख्या गर्नुभएको थियो ।
समय विभाजनको सन्दर्भमा उहाँले २००० देखि २०१६ साल, २०१७ देखि २०४५ साल र २०४७ देखि २०६२ सालसम्मको अवधिलाई विगतकालको रूपमा र २०६२ सालदेखि यताको अवधिलाई वर्तमान कालको रूपमा उल्लेख गर्नुभएको थियो ।
कार्यपत्रमा उहाँले बागमती प्रदेश प्रगतिशील लेखनको उर्वरस्थल रहेको बताउनुभयो । बाहिरबाट आएर पनि काठमाडौँलाई नै केन्द्रविन्दु बनाएर साहित्य सृजना गर्ने गरिएकाले पनि यस क्षेत्र उर्वर रहेको उहाँको भनाइ थियो ।
कार्यक्रममा प्रमुख अतिथिको आसनबाट मन्तव्य राख्दै अध्यक्ष प्राडा जीवेन्द्र देव गिरीले इतिहासलाई लिपिबद्ध गर्ने कामलाई केन्द्रले मात्र नभएर जिल्लाहरूले पनि अगाडि बढाउनुपर्ने आवश्यकतामा जोड दिनुभएको थियो ।
उपाध्यक्ष गोपीरमण उपाध्यायको अध्यक्षता तथा महासचिव समीर सिंहको सञ्चालनमा अघि बढेको सो कार्यक्रममा डा. ध्रुवकुमार घिमिरे, डा. कृष्णराज अधिकारी, जगत्प्रसाद रेग्मी, पुण्यप्रसाद खरेल र रमेश भट्टराईले पूरक मन्तव्य राख्नुभएको थियो ।
