दाङ । प्रगतिशील लेखक सङ्घ नेपाल दाङ शाखाको एघारौँ जिल्ला अधिवेशन आगामी पुसमा हुने भएको छ ।
तीन वर्षअघि २०७५ जेठ नयाँ कार्यसमिति चयन भएअनुसार गत जेठमै अधिवेशन भइसक्नुपर्ने थियो । तर कोरोना महामारीका कारणले गर्दा कार्यसमितिको म्याद छ महिना थप गरेर पुसमा अधिवेशन गर्ने निर्णय गरिएको अध्यक्ष भूवन देवकोटा (शरद) ले जानकारी दिनुभयो ।
प्रलेस दाङका अध्यक्ष देवकोटाको अध्यक्षतामा बसेको बैठकले प्रलेसको आगामी अधिवेशन पुसको ३ गते स्थापना दिवसका दिन मनाउने निणर्य गरेको थियो । बैठकले आगामी भदौमा देउखुरीमा प्रगतिशील लेखक सङ्घ र हाम्रा चाडपर्वहरू विषयमा अन्तरक्रिया कार्यक्रम गर्ने, असोजमा तुलसीपुरमा गोविन्द चिसको स्मृति दिवसमा कार्यक्रम गर्ने निर्णय गरेको छ ।
देउखुरीमा आयोजना गर्ने कार्यक्रमको जिम्मा सचिव छविलाल कोपिला र तुलसीपुरमा गर्ने कार्यक्रमको जिम्मेवारी कार्यसमिति सदस्य डिल्ली बस्नेत सङ्गीतलाई दिइएको छ । बैठकले प्रलेसका सदस्यहरूको सदस्यता नवीकरण गर्ने र नयाँ सदस्यता पनि वितरण गर्ने निर्णय गरेको छ, जसका लागि घोराही क्षेत्रमा अध्यक्ष भूवन देवकोटालाई, लमही क्षेत्रमा सचिव छविलाल कोपिलालाई र तुलसीपुर क्षेत्रमा सदस्य डिल्ली बस्नेत सङ्गीतलाई जिम्मेवारी दिइएको छ ।
बैठकले आगामी पुस ३ गते स्थापना दिवसका दिन विमोचन गर्ने गरी बहिङ्गाको पन्ध्रौँ अङ्क प्रकाशन गर्ने निर्णय गरेको छ, जसका लागि सम्पादकमा भूवन देवकोटा र सम्पादक मण्डलमा छविलाल कोपिला र डिल्ली बस्नेत सङ्गीतलाई जिम्मेवारी दिइएको छ । बहिङ्गाको अतिथि सम्पादकमा केन्द्रीय सदस्य शरद अधिकारीलाई जिम्मेवारी तोकिएको छ ।
प्रलेस दाङ शाखाको बैठकमा केन्द्रीय सल्लाहकार पद्मप्रसाद शर्मा, केन्द्रीय सल्लाहकार शरद अधिकारी, पलेस लुम्बिनीका कोषाध्यक्ष निमबहादुर थापाले सुझावसहित मन्तव्य व्यक्त गर्नुभएको थियो ।
