काठमाडौँ । नेकपा (एमाले) का नेता भीम रावलले प्रतिनिधि सभा सदस्य पदबाट दिएको राजीनामा फिर्ता लिएका छन् । साउन ८ गते सिंहदरबारस्थित संसद सचिवालयमा सभामुख अग्नि सापकोटालाई भेटेर उनले राजीनामा फिर्ता लिएका हुन् ।

आफ्नो निर्वाचन क्षेत्रका मतदाता, आमजनता र पार्टी सदस्यको आग्रहअनुसार आफूले राजीनामा फिर्ता लिएको दाबी उनले गरेका छन् । निर्णय फिर्ता लिनुपरेकोमा सभामुखलाई “सरी” भन्दै उनले राजीनामा फिर्ता लिएको जानकारीसमेत गराएका थिए ।

यसअघि प्रधानमन्त्री शेरबहादुर देउवाले विश्वासको मत दिने दिन साउन ३ गते रावलले प्रतिनिधि सभा सदस्यबाट राजीनामा दिने घोषणा गरेका थिए ।

अछाम निर्वाचन क्षेत्र नम्बर १ बाट निर्वाचित सांसद रावलले राजनीतिक दलका शीर्ष नेतामा स्वेच्छाचारिता बढेको तथा घृणित राजनीतिक खेल खेलबाट आफूलाई अलग राख्नु श्रेयस्कर ठानेर राजीनामा दिएका थिए । त्यसलगत्तै रावलले राजीनामा बारेको जानकारी सभामुखलाई समेत जानकारी गराइसकेका थिए ।

तर राजीनामा फिर्ता लिन एमालेका दुबै पक्षले रावललाई आग्रह गर्दै आएका थिए । एमाले अध्यक्ष केपी ओलीले केन्द्रीय समिति बैठकमै रावललाई राजीनामा फिर्ता लिन आग्रह गरेका थिए भने माधव नेपालले पनि उनकै निवास पुगेर त्यसबारे आग्रह गरेका थिए ।

यसैबिच उनले साउन ८ गते नै राजीनामा फिर्ता लिएको ट्विट गरेका छन्

उनले ट्विटमा लेखेका छन्– “स्वस्थ, मर्यादित र विधिसम्मत राजनीति, राष्ट्रहित र पार्टीएकताका लागि आवेग, उत्तेजनामा नआई प्रतिनिधि सभाको सदस्यबाट राजीनामा दिएको थिएँ । सार्वभौम जनता, मतदाता, राजनीतिक नेता, कार्यकर्ता, जनप्रतिनिधि, बुद्धिजीवी, आफन्त र शुभेच्छुकको व्यापक आग्रहको सम्मान गर्दै राजीनामा फिर्ता लिएको छु ।”

स्वस्थ,मर्यादित र विधिसम्मत राजनीति,राष्ट्रहित र पार्टी एकताको लागि आवेग,उत्तेजनामा नआई प्रतिनिधि सभाको सदस्यबाट राजीनामा दिएको थिएँ।सार्वभौम जनता,मतदाता,राजनीतिक नेता,कार्यकर्ता,जनप्रतिनिधि,बुध्दिजीवी,आफन्त र शुभेच्छुकहरूको व्यापक आग्रहको सम्मान गर्दै राजीनामा फिर्ता लिएको छु।

— Dr. Bhim Rawal (@BhimRawal179) July 23, 2021