काठमाडौं । नेपाली कांग्रेसको महाधिवेशन नजिकिँदै जाँदा दुई पक्षबीच किचलो बढ्दै गएको छ । कांग्रेसको क्रियाशील सदस्यतासम्बन्धी विवाद बढ्दै गएपछि ललितपुरको सानेपास्थित पार्टी कार्यालयमा नेताहरु आमरण अनशनमा बसेका छन् ।
रमाइलो त के भने, एक पक्षका नेताहरु आमरण अनशनमा बस्दा अर्को पक्ष भने पार्टी कार्यालयमै काउन्टर धर्ना दिइरहेका छन् । वरिष्ठ नेता रामचन्द्र पौडेल र महामन्त्री शशांक कोइराला पक्षका बारा जिल्लाका नेता–कार्यकर्ता केन्द्रीय कार्यालयको मुल ढोकामा १३ दिनदेखि अनशन बसेका छन् भने पार्टी सभापति शेरबहादुर देउवा पक्षका नेता–कार्यकर्ता कार्यालय परिसमै काउन्टर धर्नामा छन् ।
देउवा पक्षीय धर्नाको नेतृत्व बारा जिल्ला कार्यसमितिका सभापति जयचन्द्र चौरासियाले गर्नुभएको छ । पार्टी कार्यालयको आँगनमा धर्नामा बसेका करिब दुई सय नेता कार्यकर्तालाई त्यर्हीँ मेशको व्यवस्था मिलाइएको छ ।
क्रियाशील सदस्यता विवादकै कारण सर्लाह–४ बाट निर्वाचित सांसद डा. अमरेशकुमार सिंहले प्रतिनिधि सभा सदस्य पदबाटसमेत राजीनामा दिनुभएको छ ।
क्रियाशील सदस्यता नवीकरण र वितरणमा धाँधली भइरहेको दाबी गर्दै बारा, धनुषा र सप्तरीका नेता–कार्यकर्ताहरुले सानेपामा धर्नादेखि आमरण अनशन समेत गरिरहेका छन् । विभिन्न जिल्लाबाट नेता कार्यकर्ताहरू धर्नामा बसिरहँदा कांग्रेस क्रियाशील सदस्यता छानबिन समितिका संयोजक रमेश लेखक भने सप्तरी र बाराबाहेक ७५ जिल्लाका अधिकांश निर्वाचन क्षेत्रको क्रियाशील सदस्यता टुंगो लगाइसकेको पनि दाबी गर्नुहुन्छ । तर, उहाँको दाबीविपरीत पार्टीको उच्च तहका नेताहरू नै धर्ना बस्नेप्रति ऐक्यवद्धता जनाउन धर्ना र अनशनस्थलमा पुगिरहेका छन् ।
क्रियाशील सदस्यताको टुंगो नलागेका कारण कांग्रेसको १४ औँ महाधिवेशनको कार्यतालिका प्रभावित हुने देखिएको छ । कांग्रेसको गत असार ४ गते बसेको केन्द्रीय कार्यसमिति बैठकले महाधिवेशन आगामी भदौ १६ देखि १९ गतेसम्म काठमाडौँमा गर्ने निर्णय गरेको थियो ।
उक्त कार्यतालिकाअनुसार गाउँ/नगर वडा अधिवेशन आगामी साउन १२ गते, गाउँ/नगरपालिका अधिवेशन साउन १६ गते र प्रदेशसभा क्षेत्रीय अधिवेशन साउन २० गते हुनेछ। यसैगरी प्रतिनिधिसभा क्षेत्रीय अधिवेशन/एक मात्र प्रतिनिधिसभा निर्वाचन क्षेत्र भएको जिल्ला अधिवेशन साउन २३, एकभन्दा बढी प्रतिनिधिसभा निर्वाचन क्षेत्र भएको जिल्ला अधिवेशन साउन २६ र प्रदेश अधिवेशन भदौ १ र २ गते निर्धारण गरिएको छ।
