गिरीप्रसाद बुढा, मुसिकोट ।।
राप्ती साहित्य परिषद् जिल्ला शाखा रुकुम पश्चिमको चौधौँ वार्षिक समारोह तथा रुकुम साहित्यमालाको ८५औँ शृङ्खला २०७८ असार २६ गतेका दिन मुसिकोट नगरपालिकाअन्तर्गत रहेको यमुना नन्द मावि सेरीगाउँको सभाहलमा सम्पन्न भएको छ ।
राप्ती साहित्य परिषद् रुकुम पश्चिमका अध्यक्ष मनलाल ओलीको अध्यक्षता रहेको यस कार्यक्रमको प्रमुख अतिथिमा मुसिकोट नगरपालिकाका नगर प्रमुख देविलाल गौतम हुनुहुन्थ्यो भने विशेष अतिथिमा नगर उपप्रमुख प्रेमकुमारी सुनार, प्रगतिशील लेखक सङ्घ कर्णाली प्रदेशका अध्यक्ष गिरीप्रसाद बुढा र सुमना अक्षयकोषका संस्थापक मुकुन्दप्रसाद शर्मा हुनुहुन्थ्यो ।
त्यसैगरी, अन्य अतिथिमा प्रगतिशील लेखक सङ्घ रुकुम पश्चिमका अध्यक्ष कमप्रसाद देवकोटा, प्रलेस रुकुमका सल्लाहकार नन्दराम देवकोटा, जनविकास पुस्तकालय रुकुम पश्चिमका उपाध्यक्ष नारायणप्रसाद शर्मा, यमुनानन्द नमुना माविका प्रअ दामोदर पौडेल, कला, साहित्य संस्कृति संरक्षण मञ्च त्रिवेणी रुकुम पश्चिमका अध्यक्ष कुवेर ओली, साहित्यकारहरू गोपाल ओली, दिलिपकुमार देवकोटा र सत्यनारायण श्रेष्ठलगायत हुनुहुन्थ्यो ।
कार्यक्रममा रुकुम साहित्यमाला पुरस्कार–२०७८ बाट साहित्यकार नदीराम केसी तथा सुमना सुमन पुरस्कार–२०७८ बाट पत्रकार मनिष खड्का पुरस्कृत हुनुभएको थियो ।
साहित्यकार नदीराम केसीको स्रष्टा चिनारी साहित्यकार कमप्रसाद देवकोटाले गराउनुभएको थियो भने पत्रकार मनिष खड्काको चिनारी साहित्यकार मुकुन्दप्रसाद शर्माले गराउनुभएको थियो ।
कार्यक्रममा संस्थाको वार्षिक प्रतिवेदन अध्यक्ष मनलाल ओलीले प्रस्तुत गर्नुभएको थियो भने आर्थिक प्रतिवेदन सचिव ओमबहादुर खत्रीले प्रस्तुत गर्नुभएको थियो ।
पत्रकार मनिष खड्काले संस्थाको उत्थानका लागि भन्दै नगद दुई हजार राप्ती साहित्य परिषद् रुकुम पश्चिम शाखालाई हस्तान्तरण गर्नुभएको थियो ।
त्यसैगरी मुसिकोट नगर प्रमुख साहित्यिक अक्षयकोषका लागि मुसिकोट नगरपालिकाले यस परिषद्लाई एक लाख नगद प्रदान गर्ने निर्णय भएको जानकारी गराउँदै मुसिकोट नगरपालिकाका नगर प्रमुख देविलाल गौतमले सांस्कृतिक रूपान्तरणका लागि मुसिकोट नगरपालिकाले नयाँ योजना बाएर अगाडि बढ्ने कुरा व्यक्त गर्नुभएको थियो ।
कार्यक्रममा एक्कबहादुर केसी, समष्टि बुढा, नन्दराम देवकोटालगायतका करिब दर्जन स्रष्टाले रचना वाचन गरेका थिए भने वाचित रचनाको समीक्षा साहित्यकार मुकुन्दप्रसाद शर्माले गर्नुभएको थियो ।
राप्ती साहित्य परिषद्का सदस्य रूपा केसीको स्वागत मन्तव्य रहेको कार्यक्रमको सञ्चालन सचिव ओमबहादुर खत्रीले गर्नु भएको थियो ।
