काठमाडौँ । माओवादी छाडेका नेताहरू सो पार्टी खारेजीका लागि ताकेता गर्न निर्वाचन आयोग पुगेका छन् । माओवादी–केन्द्र खारेजीको लागि निर्वाचन आयोगमा दिइएको निवेदनको सम्बन्धमा बुझ्नका लागि शुक्रबार पूर्व माओवादी नेताहरू आयोग पुगेका छन् ।

त्यस क्रममा नेकपा (माओवादी–केन्द्र) का पूर्वनेता टोपबहादुर रायमाझीले माओवादी–केन्द्र भूमिगत र छापामार किसिमले चलिरहेको आरोप लगाउनुभयो । नेता रायमाझीले माओवादी–केन्द्र नेपालको संविधान, कानुन र राजनीतिक दलसम्बन्धी ऐन अनुसार नचली भुमिगत र छापामार किसिमले चलिरहेको आरोप लगाउनुभएको हो ।

उहाँले विगत २९ वर्षदेखि सो पार्टीमा महाधिवेशन नभएको भए पनि २०६९ सालमा एउटा नाम मात्रैको महाधिवेशन भएको र तत्पश्चात पनि महाधिवेशन नभएका कारण पार्टी नै अवैध भएको पनि बताउनुभयो । उहाँले अवैध पार्टीले जननिर्वाचित प्रतिनिधिलाई कारबाही गरको पनि उल्लेख गर्नुभयो ।

उहाँले विस्तारपूर्वक भन्नुभयो– ‘माओवादी–केन्द्र नेपालको संविधान, नेपालको कानुन र राजनीतिक दलसम्बन्धी ऐनअनुसार चलिरहेको छैन । एक प्रकारले भन्ने हो भने भूमिगत र छापामार किसिमले यो पार्टी चलिरहेको छ । करिब २८, २९ वर्षसम्म यो पार्टीको कुनै महाधिवेशन भएको थिएन । एउटा महाधिवेशन भएको थियो २०६९ सालमा नाम मात्रैको । २०७८ सालसम्म, ९ वर्षसम्म अर्को महाधिवेशन त्यो पार्टीले गरेको छैन । एमाले, माओवादीको एकतालाई शून्य समय मानेपनि करिब ७ वर्ष भयो । राजनीतिक दलसम्बन्धी ऐनमा प्रत्येक ५ वर्षमा महाधिवेशन गर्नुपर्ने भनेको छ । उसले आफ्नो अद्यावद्यिक गर्न सकिरहेको छैन । त्यस्तो अवैधानिक पार्टीले वैधानिक जनप्रतिनिधिलाई कारबाही गरियो । संघीय सांसद, प्रदेश सांसद, स्थानीय तहका जनप्रतिनिधि, जनताबाट प्रत्येक्ष चुनिएका वैधानिक जनप्रतिनिधिलाई अवैधानिक पार्टीले कारबाही गर्ने ?’

नेता रायमाझीसँगै निर्वाचन आयोगमा माओवादी–केन्द्रका पूर्वनेताहरू मणि थापा, प्रभु शाहलगायत पुग्नुभएको थियो । उहाँहरूले माओवादी–केन्द्र खारेजीको माग गर्दै आयोगमा परेको निवेदनको निर्णय छिटो गर्न पनि आयोग समक्ष आग्रह गरेको नेता रायमाझीले बताउनुभयो ।

सरोकारै नराख्नेको प्रयास हास्यास्पद : माओवादी
नेकपा माओवादी–केन्द्रले आफ्नो दल दर्ता खारेजी माग गर्दै निर्वाचन आयोगमा निवेदन दर्ता भएको खबरप्रति ध्यानाकर्षण भएको जनाएको छ ।

शुक्रबार माओवादी–केन्द्रको केन्द्रीय कार्यालयले विज्ञप्ति जारी गरी आफ्नो दलसँग सरोकारै नभएका व्यक्तिले आफ्नो खारेजी माग गर्नु हास्यास्पद भएको टिप्पणी गरेको हो ।

‘नेपाल कम्युनिस्ट पार्टी (माओवादी–केन्द्र) को दल दर्ता खारेजी सम्बन्धमा भनी’ सरोज बुढाथोकी कमलामाई नपा–१० सिन्धुली हाल कागेश्वरी मनहरा न।पा। ७ काठमाडौँको नामबाट प्रमुख निर्वाचन आयुक्तलाई सम्बोधन गरी निर्वाचन आयोगमा दर्ता गराएको भन्ने कुरा सार्वजनिक सञ्चार माध्यमबाट यस पार्टीमा जानकारी हुन आएकोमा हाम्रो ध्यान आकृष्ट भएको छ’ विज्ञप्तिमा भनिएको छ– ‘हाम्रो पार्टीसँग कुनै पनि सरोकार नराख्ने व्यक्ति निवेदक रहेको र दल दर्ता र दल खारेजीसम्बन्धी सामानय कानुनी प्रक्रियासमेत जानकारी नभएको व्यक्तिले यस्तो हर्कत् गर्नु हास्यास्पद देखिन्छ ।’

साथै यस्ता अनाधीकृत निवेदन दर्ता गर्ने काम आइन्दा नगर्न भन्दै उसले निर्वाचन आयोगलाई सचेतसमेत गराएको छ।

‘संविधान, कानुन, विधि, विधानविपरीत दुष्प्रचार गरिएकोमा पार्टीका सम्पूर्ण अङ्ग, नेता, कार्यकर्ता, शुभचिन्तक भ्रममा नपर्न आग्रह गर्दछौँ’ माओवादी–केन्द्रले जारी गरेको विज्ञप्तिमा भनिएको छ– ‘त्यस्ता प्रकारका अनाधीकृत तथा आयोगसँग बेसरोकार निवेदन दर्ता स्वीकृत गर्दा अनावश्यक भ्रम सिर्जना हुने भएकाले आइन्दा त्यसो नगरियोस् भन्ने आग्रहसमेत गर्दछौँ ।’