काठमाडौँ । नेपाल वायुसेवा निगममा कार्यरत कर्मचारीहरुले निगमलाई निजीकरण गर्ने निर्णय फिर्ता नहुञ्जेलसम्म आन्दोलन जारी रहने बताएका छन् । सरकारको स्वामित्वमा रहेको निगमलाई कौडीको भाउमा बेचेर निजीकरण गर्न लागिएको भन्दै कर्मचारी आन्दोलित भएका हुन् ।
नेपाल वायुसेवा निगम संयुक्त ट्रेड युनियनले बुधबार पत्रकार सम्मेलन गर्दै निगमलाई निजीकरण गर्ने निर्णय फिर्ता नलिएसम्म आफूहरुको आन्दोलन जारी रहने बताए । साथै, ट्रेड युनियनले नेपाल वायु सेवा निगमका महाप्रबन्धक डिम प्रकाश पौडेलको राजीनामा समेत माग गरेको छ ।
निगममा रहेको तीनवटै ट्रेड युनियनहरुले शान्तिपूर्ण आन्दोलन गर्दा पनि कर्मचारीहरुमाथि बर्बरतापूर्ण ढंगले लाठी चार्ज गरी कर्मचारीहरुलाई घाइते बनाएको प्रति पनि संयुक्त ट्रेड युनियनले भर्त्सना गरेको नेपाल वायुसेवा निगम संयुक्त ट्रेड युनियनका महासचिव हेम लम्सालले बताउनुभयो ।
निगमको महाप्रवन्धक डिम प्रसाद पौडेलले निगमको सम्पतिको कम मूल्यांकन गरेको, सम्बन्धित मन्त्रालय तथा आम कर्मचारीलाई छल्दै निगम बेच्ने रणनीति बनाएको तथा गलत उद्देश्य राखि सिमित व्यक्तिको माग पुरा गर्ने राष्ट्रघाती कदम चालिएकाले पौडेलको राजीनामा माग्नुपरेको महासचिव लम्सालले बताउनुभयो ।
निगमलाई कम्पनीमा लान प्रक्रिया सुरु
निगमका महाप्रबन्धक डिम प्रसाद पौडेलले भने निगमलाई कम्पनी मोडलमा लैजाने प्रक्रिया बजेटमा भएको व्यवस्थाअनुसार अघि बढाएको बताउनुभएको छ ।
पौडेलले अर्थ मन्त्रालयले असार १ गते पत्रमार्फत बजेटमा भएको व्यवस्था कार्यान्वयन तथा कर्मचारी सञ्चयकोष र नागरिक लगानी कोषले निगममा गरेको ऋण लगानी सम्बन्धमा अर्थ सचिवबाट निर्देशन प्राप्त भएको बताउनुभयो ।
निगमलाई कम्पनी मोडलमा रुपान्तरण गर्न यथासिघ्र डीडीए गर्न र निगमको पुनःसंरचना गर्न निमगले प्रबन्धपत्र तथा नियमावलीको मस्यौदा तयारगरी लिमिटेड कम्पनीमा रुपान्तरण गर्न निर्देशन अनुसार काम भएको उहाँले बताउनुभयो ।
त्यस्तै अर्थ मन्त्रालयले सञ्चयकोष र नागरिक लगानी कोषबाट नेपाल वायुसेवा निगममा गरेको ऋण लगानीमा हाल लिँदै आएको ब्याजदर र हर्जाना सम्बन्धमा पुनर्विचार गर्न निगमले कर्मचारी सञ्चय कोष र नागरिक लगानी कोषसंग आवश्यक समन्वयगरी चालू वर्षको ब्याज दायित्वय एकिन गर्न समेत निर्देशन दिएको थियो।
महाप्रवन्धक पौडेलका अनुसार आगामी आर्थिक वर्षको बजेटमा नेपाल वायुसेवा निगमको संगठन पुनसंरचना गरी व्यवसायिक एवम् प्रतिस्पर्धी बनाइनेछ भने खुल्ला प्रतिस्पर्धाको माध्यमबाट रणनीतिक साझेदार भित्र्याउने प्रक्रिया सुरु गरिनेछ । निगमको शेयर पूँजी संरचना परिवर्तन गरी वृद्धि गरिने पोडेलको दाबी छ ।
