काठमाडौँ । नेकपा (माओवादी–केन्द्र) का अध्यक्ष पुष्पकमल दाहाल प्रचण्डको विरुद्धमा माओवादीका निर्वतमान चार सांसदहरू सर्वाेच्च अदालतमा मुद्दा दायर गर्न लागेका छन् ।
२०७७ फागुन २३ मा माओवादी छाडेर नेकपा (एमाले) मा प्रवेश गरेका पूर्व माओवादी नेता तथा निवर्तमान सांसदहरू लेखराज भट्ट, प्रभु साह, टोपबहादुर रायमाझी र गौरीशङ्कर चौधरीले अध्यक्ष प्रचण्डको विरुद्धमा सर्वाेच्च अदालतमा मुद्दा दायर गर्न लागेका हुन् ।
आफूहरूलाई असंवैधानिक ढङ्गले सांसद पदबाट हटाइएको भन्दै उनीहरू सर्वाेच्च अदालतमा जान लागेको बताइएको छ । अहिले सर्वाेच्च अदालतमा प्रतिनिधि सभा विघटनको मुद्दाको फैसला हुन बाँकी रहेको अवस्थामा त्यसैलाई मध्यनजर गर्दै उनीहरूले कानुनी परामर्श तीव्र बनाएको बताइन्छ ।
उनीहरूले रिट निवेदनको ड्राफ्ट तयार गरिसकेको जानकारीमा आएको छ । तयार पारिएको ड्राफ्टमा माओवादीको सिफारिसका आधारमा सांसदबाट पदमुक्त भएका उनीहरूले आफूलाई गरिएको कारबाही र पदमुक्तसम्बन्धी निर्णय अवैध भएको दावी गरेका छन् ।
उनीहरूले प्रतिनिधि सभा विघटन मुद्दाको फैसलामा सर्वाेच्च अदालतले प्रतिनिधि सभा पुनःस्थापना गरिदिएको अवस्थामा भोलिपल्टै चार नेताहरू सर्वोेच्च अदालतमा गएर अध्यक्ष प्रचण्ड विरुद्ध रिट दायर गर्ने तयारी रहेका छन् ।
