काठमाडौं । प्रतिनिधि सभा विघटनसम्बन्धी मुद्दाको बहस आज सकिँदैछ । सो सम्बन्धी परेका ३० वटा रिट निवेदनको सुनुवाइ आज सकिने सर्वोच्च अदालतले जनाएको छ ।
प्रधानन्यायाधीश चोलेन्द्र शम्शेर जबरा, न्यायाधीशहरू दीपककुमार कार्की, मीरा खड्का, ईश्वर खतिवडा र आनन्दमोहन भट्टराईको इजलासमा असार ९ गतेदेखि सुरु भएको बहस अन्तिम चरणमा पुगेको हो । अब फैसला कहिले र कस्तो आउला भन्ने सर्वत्र चासो छाएको छ।
गत साता शुक्रवारसम्म रिट निवेदक र विपक्षी दुवैका तर्फबाट बहस सकिएपछि आइतवारबाट रिट निवेदकतर्फका कानुन व्यवसायीहरूले जवाफी बहस सुरु गरेका थिए । अदालतले रिटमाथिको प्रारम्भिक सुनुवाइकै क्रममा पक्ष र विपक्षका वकिलहरू तथा एमिकस क्युरीका लागि बहस गर्ने समय तोकिदिएको थियो ।
साथै राष्ट्रपति कार्यालय र प्रधानमन्त्री कार्यालयलगायतका विपक्षीले बुझाउनुपर्ने लिखित जवाफ र वकिलहरूले बुझाउनुपर्ने बहस नोटका लागि पनि समय तोकिएको थियो।
जेठको पहिलो साता राष्ट्रपति विद्यादेवी भण्डारीले संविधानको धारा ७६ (५) अनुसार प्रधानमन्त्रीका लागि प्रधानमन्त्री केपी शर्मा ओली र विपक्षी दलका सभापति शेरबहादुर देउवा दुवैको दावी नपुगेको बताउँदै मन्त्रिपरिषद्को सिफारिसमा दोस्रो पटक प्रतिनिधि सभा विघटन गर्नुभएको थियो । त्यसपछि त्यससँग सम्बन्धित विभिन्न ३० वटा रिट निवेदनहरू सर्वोच्च अदालतमा परेका थिए।
ती निवेदनहरूमा मुख्य गरी प्रतिनिधि सभा पुनर्स्थापना हुनुपर्ने र विपक्षी दलका नेता देउवालाई प्रधानमन्त्री बनाउनुपर्ने भन्दै परमादेशको आदेश माग गरिएको छ।
जेठअघि गत पुस महिनामा पनि मन्त्रिपरिषद्को सिफारिसमा राष्ट्रपति विद्यादेवी भण्डारीले प्रतिनिधि सभा विघटन गर्नुभएको थियो । त्यसविरुद्ध परेका रिट निवेदनको सुनुवाइमा सर्वोच्च अदालतले यसअघि प्रतिनिधि सभा पुनर्स्थापना हुने फैसला सुनाएको थियो ।
