ओट्टावा । क्यानडाको मानितोबामा बेलायती महारानीहरू भिक्टोरिया र एलिजाबेथ द्वितीयाका दुई मूर्ति भत्काएर क्षतविक्षत गरिएको छ ।

केही समयअघि क्याथोलिक चर्चले चलाएको विद्यालयमा आदिवासी सयौँ बालबालिकाका चिहान फेला परेपछि उपनिवेशवादको प्रतीकका रूपमा रहेको बेलायती महारानीको मूर्ति भत्काइएको हो ।

प्रदर्शनकारीले रानी भिक्टोरियाको मूर्तिमा रातो पेन्ट पोतेका थिए । त्यसमा यस्तो लेखेका थिए– ‘हामी पनि कुनै बेलामा बालबालिका थियौँ । उनीहरूलाई घर फर्काऊ ।’

उक्त घटनाको भिडियोसमेत सार्वजनिक भएको छ । उक्त भिडियोमा प्रदर्शनकारीले मूर्तिमा डोरीले बाँधेर लडाएको अनि “लडाऊ ! लडाऊ !” भनी चिच्याएको सुनिन्छ ।

मूर्ति लडाएपछि भेला भएका मानिसहरूले खुसियाली मनाएको समेत देख्न सकिन्छ ।

हराएका बालबालिकाको सम्मानका लागि प्रदर्शनकारीले सुन्तला रङको सर्ट लगाएका थिए । उनीहरू प्रत्येक बालबालिकाको जीवनको महत्त्व नामक जुलुसमा समेत भाग लिएका थिए ।

क्यानडामा जुलाई १ मा राष्ट्रिय दिवस मनाउने गरिन्छ र मानितोबा संसदमा गरिएको प्रदर्शन त्यसै अवसरमा भएको हो ।
आवासीय विद्यालयमा फस्र्ट नेसन भनिने आदिवासी समुदायका सयौँ बालबालिकाका भौतिक अवशेष फेला परेपछि कठोर प्रतिक्रिया आइरहेका छन् ।

क्याथोलिक चर्चले चलाएको विद्यालयमा बालबालिकाका शव भेटिएपछि विरोधकर्ता चर्च बाहिर भेला भएर विरोध गरिरहेका छन् । कतिपय चर्चमा आगजनीसमेत गरिएको छ । (एजेन्सी)

Protesters topple statues of The Queen and Queen Victoria over deaths of Indigenous children found in mass graves pic.twitter.com/zEhe7vMQtG

— The Sun (@TheSun) July 2, 2021