खिमराज चालिसे

जीवनलाई मृत्युको मुखमा पुर्यायो जब उसले ।
हाम्रो मनमस्तिष्कमा डर र त्रास देखायो उसले ।।
मानौँ हार नै रहेछ क्यारे भन्ने अनुभुति भयो ।
तर मृत्युलाई हराउने इच्छा पनि साथै आयो ।।

भित्र मन भन्थ्यो दृढतासँग लडदै जानुपर्छ ।
यस्ता ज्यानमारा रोगलाई आफै हराउनुपर्छ ।।
शत्रुसँग डराएर होइन प्रतिकार गर्नुपर्छ ।
प्रतिकार गर्ने हिम्मत गरौँ मृत्युले हार्नुपर्छ ।।

सयौँ ऊर्जाका सन्देश देशविदेशबाट पाइरहे ।
ऊर्जात्मक सयौ मित्रको सशक्त माया पाइरहे ।।
त्यसैले त हामी जीवन बचाउन सफल भयौँ ।
कोरोना चिहानभित्र फ्याँक्न पनि सफल भयौँ ।।

अब सङ्गठित भएर कोरोना भगाउनु छ ।
लुकेर वार गर्ने छद्म चिनेर भगाउनु छ ।।
भन्छन् एउटा गन्दा माछाले पूरा ताल सडाउँछ ।
एउटा अराजकले पूरा समाजनै सडाउँछ ।।

भित्रभित्रै संरचना भत्काउने त्यो कोरोना चिनौँ ।
अहङ्कार घमण्डले चुर छ उसको घमन्ड तोडौँ ।।
स्वच्छ समाज निर्माणमा सबैको नै महत्त्व हुन्छ ।
जसले प्रतिकूलमा साथ दिन्छ त्यो सच्चा मित्र हुन्छ ।।

मित्रहरूको सशक्त एक्यबद्धता सुदृढ पारौँ ।
भित्रीबाहिरी आक्रामक विरुद्ध एकजुट पारौँ ।।
सङ्गठित स्वरूप स्पष्ट र एकजुट पार्दै जाऊँ ।
सबै अदृष्य कोरोना समाप्त पार्न जुटेर जाऊँ ।।