काठमाडौं । पाँच विपक्षी दलले प्रधानमन्त्री केपी ओलीको स्वेच्छाचारी कदमविरुद्ध कानुनी लडाईँसँगै सडक संघर्षलाई अगाडि बढाउने भएका छन् । बुधबार बसेको पाँच दलका शीर्ष नेताहरुको बैठकले अब सडक संघर्षमा जाने निर्णय गरेको हो ।

गठबन्धनले आज (बिहीबार) विरोधको ढाँचा तयार गर्ने र सो कार्यक्रम सार्वजनिक गर्ने तय गरेको राष्ट्रिय जनमोर्चाका नेता कृष्ण अधिकारीले जानकारी दिनुभयो । अधिकारीसहित पाँचै दलबाट एक एक जना नेताहरु सम्मिलित कार्यदलले विरोधको खाका तय गर्ने जिम्मेवारी पाएको छ । कार्यदलमा राजमोबाट नेता अधिकारी, कांग्रेसका महामन्त्री पूर्णबहादुर खड्का, माओवादी केन्द्रका नेता देव गुरुङ, जनता समाजवादी पार्टीका नेता राजेन्द्र श्रेष्ठ र एमाले नेता भीम रावल हुनुहुन्छ ।

राजमो पूर्वसचिव अधिकारीका अनुसार कार्यदलले शीर्ष नेतृत्व र विभिन्न सञ्चारमाध्यमका सम्पादकहरुबीच अन्तरक्रिया गराउने भएको छ । विपक्षी दलहरुले ओलीको प्रतिगामी कदमविरुद्ध जनमत तयार पार्न सञ्चारमाध्यमले खेलेको भूमिकाको प्रशंसा गर्दै थप सहयोगको लागि आव्हान पनि गरेका छन् ।

हिजोका बैठकबाट अदालतमा बलियो कानुनी प्रतिरोध गर्ने र कोभिड– १९ को महामारीलाई ध्यानमा राख्दै स्वास्थ्य मापदण्डभित्र रहेर सडकबाट समेत प्रतिरोध गर्ने निर्णय भएको अधिकारीले बताउनुभयो ।

बुधबार साँझ कांग्रेस सभापति शेरबहादुर देउवानिवासमा बसेको गठबन्धनका शीर्ष नेताको बैठकले राष्ट्रपति र सरकारका असंवैधानिक कदमविरुद्ध कानुनी र राजनीतिक संघर्षलाई सँगसँगै अगाडि बढाउने निर्णय गरेको हो । छलफलमा नेपाली कांग्रेसबाट सभापति देउवासहित रामचन्द्र पौडेल, बालकृष्ण खाण, माओवादी केन्द्रका अध्यक्ष पुष्पकमल दाहाल प्रचण्ड, नारायणकाजी श्रेष्ठ, देव गुरुङ, जसपाका उपेन्द्र यादव र बाबुराम भट्टराई, एमालेबाट माधव कुमार नेपाल, भीम रावल, राष्ट्रिय जनमोर्चाबाट उपाध्यक्ष दुर्गा पौडेल सहभागी हुनुहुन्थ्यो ।

विपक्षी गठबन्धनले प्रतिनिधिसभा विघटन गर्ने निर्णय बदर गर्न र संविधानको धारा ७६ (५) बमोजिम देउवालाई प्रधानमन्त्री बनाउन माग गर्दै सर्वोच्च अदालतमा रिट निवेदन गरेका छन् । उक्त मुद्दामा बुधबारदेखि बहस सुरु भएको छ । बहस सुरु भएकै दिन गठबन्धनले सडक–संघर्षमा जाने निर्णय लिएको हो ।

आज विद्यार्थीको प्रदर्शन
गठबन्धनसम्बद्ध पाँच दलका विद्यार्थी संगठनले आज (बिहीबार) देशभरि संयुक्त विरोध प्रदर्शन गर्ने घोषणा गरेका छन् । कोभिड संक्रमणको जोखिमलाई ध्यान दिएर स्वास्थ्य मापदण्ड पालनासहित विरोध प्रदर्शन गरिने विद्यार्थी नेताहरुले जनाएका छन् ।