दाङ । कोभिडका कारण सिङ्गो दाङ जिल्ला पीडित भइरहेका बेला जनतामा राहत पुर्याउने गरी राष्ट्रिय जनमोर्चाको टोली वडा वडामा पुग्ने भएको छ ।
२०७८ जेठ २३ गते केन्द्रीय कार्यकारी अध्यक्ष रश्मीराज नेपाली र पूर्वकेन्द्रीय सदस्य सुरेश थापाको उपस्थितिमा बसेको राजमो दाङको भर्चुअल बैठकले सो निर्णय गरेको हो ।
बैठकपछि जिल्लाध्यक्ष गणेश आचार्यले आजै जारी गर्नुभएको प्रेसविज्ञप्तिमा सो जानकारी दिइएको छ ।
“सङ्क्रमितको राम्रो उपचार हुन सकेको छैन । कामविहीन मजदुरको दैनिक खर्च चलाउन गाह्रो भएको छ । अत्यावश्यक कामले सवारी साधन प्रयोग गरी यात्रा गर्नुपर्ने नागरिकलाई झन्झटिलो विधि अपनाएर सताउने काम भएको छ । कन्टयाक्ट ट्रेसिङको काम नै भएको छैन । पिसिआर परीक्षण आम नागरिकको पहुँचमा पुग्नै सकेको छैन । त्यसैले यी सबै कुरा सहज, सर्वसुलभ र निःशुल्क व्यवस्था गर्न जरुरी छ” कोभिडका कारण गत एक महिनानेखि निषेधाज्ञामा रहेको दाङमा राजमोको भूमिकाबारे प्रेसविज्ञप्तिमा भनिएको छ– “सङ्क्रमित र आम नागरिकमा डरत्रासको वातावरण भएको तथा कतिपय नागरिक भोकभोकै बस्नु पर्ने अवस्था आएकाले उपलब्ध भएसम्म स्वास्थ्यकर्मीसहित सहयोग र सहजीकरणका लागि प्रत्येक वडामा तीन देखि पाँच जनासम्मको टोली सङ्क्रमित, सम्भावित र विपन्न नागरिकको घरघरमा पुग्ने निर्णय भयो ।”
त्यसैगरी, बैठकले ओली सरकारको असंवैधानिक, अधिनायकवादी र राष्ट्रघाती कदमका विरुद्धको आन्दोलनस्वरूप आगामी जेठ २६ गते भर्चुअल अन्तरक्रिया गर्ने जानकारी दिइएको छ ।
एवम् प्रकारले, दाङ–देउखुरीको राप्तीनदीबाट नदीजन्य पदार्थको अनियन्त्रित उत्खनन भएकोले बैठकले त्यसको विरोध गर्दै त्यसका विरुद्ध आम नागरिकसहित आन्दोलनलाई अगाडि बढाउने, त्यस क्रममा तत्काल उत्खनन रोक्ने मागसहित सबै पालिकामा ज्ञापनपत्र बुझाउने निर्णय भएको पनि प्रेसविज्ञप्तिमा जानकारी दिइएको छ ।
