गिरीप्रसाद बुढा, रुकुम पश्चिम ।।
२०७८ जेठ १५ गतेका दिन प्रगतिशील लेखक सङ्घ रुकुम पश्चिमको आयोजनामा “गणतन्त्रको स्थापनामा प्रगतिशील स्रष्टाको भूमिका“ विषयक अन्तरक्रिया कार्यक्रम भर्चुअल माध्यमबाट सम्पन्न भएको छ ।
कार्यक्रमको प्रमुख अतिथिमा प्रगतिशील लेखक सङ्घका केन्द्रीय अध्यक्ष प्राडा जीवेन्द्र देव गिरी हुनुहुन्थ्यो भने विशेष अतिथिमा प्रलेसका केन्द्रीय सल्लाहकार पदमप्रसाद शर्मा, प्रलेस केन्द्रीय सल्लाहकार रामप्रकाश पुरी, प्रलेसका पूर्व केन्द्रीय सदस्य हरिप्रसाद भण्डारी, राप्ती साहित्य परिषद्का केन्द्रीय उपाध्यक्ष कमलमणि देवकोटा, प्रलेस नेपाल कर्णाली प्रदेशका अध्यक्ष गिरीप्रसाद बुढा हुनुहुन्थ्यो । त्यसैगरी अन्य अतिथिमा साहित्यकार मनोहर लामिछाने, साहित्यकार पूर्ण ओली, लेखक तथा साहित्यकार चन्द्रा ओलीलगायतका हुनुहुन्थ्यो ।
राष्ट्रिय गान तथा सहिदप्रतिको मौनधारणपश्चात अगाडि बढेको यस कार्यक्रममा साहित्यकार तथा प्रगतिशील लेखक सङ्घ रुकुमका अध्यक्ष कमप्रसाद देवकोटाले प्रस्तुत गर्नुभएको कार्यप्रत्रमाथि साहित्यकार पूर्ण ओली र साहित्यकार चन्द्रा ओलीले विशेष टिप्पणी गर्नुभएको थियो भने अन्य प्रमुख अतिथि तथा सबै अतिथिले पनि कार्यपत्रमाथि आवश्यक सुझावसहित आआफ्ना भनाइ राख्नुभएको थियो ।
यसै क्रममा आफ्नो सुझाव तथा भनाइ राख्दै साहित्यकार रामप्रकाश पुरीले प्रगतिशील लेखकको मुख्य उद्देश्य वर्तमान विकृतिसँग लड्न सक्ने क्षमताको विकास गर्ने हुनुपर्दछ भन्दै व्यक्ति भगवान हुन नसक्ने भएकाले समाजमा जनताकोे शक्तिलाई नै स्थान दिने दृष्टिकोण प्रगतिशील लेखक सङ्घको हुनुपर्दछ भन्ने कुरा प्रष्ट पार्नुभयो ।
त्यसैगरी प्रमुख अतिथिको आसनबाट बोल्दै प्राडा जीवेन्द्र देव गिरीले ऐना ऐनाको लागि होइन, हेर्नका लागि हो भन्दै प्रगतिशील लेखकले कलालाई जीवन र जनसमुदायको हितका लागि लिनुपर्दछ भन्ने धारणा ब्यक्त गर्नु भयो ।
प्रगतिशील लेखक सङ्घ रुकुम पश्चिमका अध्यक्ष कमप्रसाद देवकोटाको अध्यक्षतामा सम्पन्न यस कार्यक्रममा साहित्यकार मनिराम खनालले समसामयिक कविता वाचन गर्नुभएको थियो ।
प्रलेस रुकुम पश्चिमका सल्लाहकार नन्दराम देवकोटाको स्वागत मन्तव्य रहेको यस कार्यक्रमको सञ्चालन सचिव मनलाल ओलीले गर्नुभएको थियो ।
