काठमाडौं । सरकारले ज्येष्ठ नागरिक भत्ता बढाएर ४ हजार पुर्याएको छ । अर्थमन्त्री विष्णुप्रसाद पौडेलले आज सार्वजनिक गर्नुभएको आगामी आर्थिक वर्षको बजेटमा वक्तव्यमा सामाजिक सुुक्षा भत्ता ३३ वृद्धिको घोषणा गर्नुभएको हो ।
हाल सरकारले ज्येष्ठ नागरिक भत्ता ३ हजार रुपैयाँ दिँदै आएको छ । वाम गठबन्धनले गत चुनावी घोषणापत्रमा मासिक रु पाँच हजारसम्म भत्ता दिने उद्घोष गरेको थियो ।
यस्तै, अर्थमन्त्री पौडेलले सबै नागरिकलाई कोभिड–१९ विरुद्ध चाँड निःशुल्क खोप उपलब्ध गराउने स्पष्ट गर्नुभएको छ । अहिले सार्वजनिक भइरहेको उक्त बजेटमा खोपका लागि रु २६ अर्ब ७५ करोड रकम विनियोजन गरिएको छ । जनताको जीवन रक्षा गर्नु सरकारको मुख्य लक्ष्य भएको अर्थमन्त्री पौडेलले बजेटको प्राथमिकतामा उल्लेख गर्नुभएको छ ।
सरकारले अध्यादेशमार्फत आर्थिक वर्ष ०७८/०७९ को बजेट ल्याएको छ । चौतर्फी विरोधका बीच सरकारले अन्ततः अध्यादेशबाट आज पूर्ण आकारको बजेट ल्याएको हो । संसद् विघटन भएका कारण यसपटक अध्यादेशमार्फत सरकारले नयाँ बजेट ल्याएको हो ।
बजेट भाषण सुरु गर्नुअघि अर्थमन्त्री पौडेलले मेलम्ची सञ्चालनमा आएको, ढलेको धरहरा उठेको, सडक पूर्वाधार, भूकम्पपछिको पुनर्निर्माण, तामाकोशी जलविद्युतले पूर्णता पाएको उल्लेख गर्दै नेपालको संविधान, चुनावी घोषणपत्र, पन्ध्रौँ योजना, दीगो विकास लक्ष्य प्राप्तिलाई आधार मानी बजेट ल्याइएको बताउनु भयो ।
जेठ १५ मा बजेट ल्याउनु पर्ने संवैधानिक बाध्यता रहेको छ। राष्ट्रपति विद्यादेवी भण्डारीले यस अघि बजेटसम्बन्धी तीनवटा अध्यादेश जारी गर्नुभएको थियो ।
