दाङ । लुम्बिनी प्रदेशको राष्ट्रियसभा सदस्य उपनिर्वाचनका लागि तीन वटा मतदान केन्द्र तोकिएको छ । २०७८ जेठ १७ गते बिहान ९ देखि दिउँसो ३ बजेसम्म घोराहीको कर्मचारी मिलन केन्द्रमा निर्वाचन हुने छ ।

तीन वटा मतदान केन्द्रअन्तर्गत एउटा केन्द्र (क) मा प्रदेशसभा सदस्य, केन्द्र (ख) मा नगरपालिकाका प्रमुख, उपप्रमुख, गाउँपालिका अध्यक्ष, उपादक्ष्य, र केन्द्र (ग) मा कोरोना सङ्क्रमितले छुट्टाछुट्टै मतदान गर्ने व्यवस्था मिलाइएको निर्वाचन कार्यालयका सूचना अधिकारी गेहेन्द्र कुँवरले जानकारी दिनुभयो । साथै प्रत्येक मतदान केन्द्रमा दुईदुई जना स्वास्थ्यकर्मी खटाउने व्यवस्था गरिएको कुँवरको भनाइ छ । एउटा मतदान केन्द्रमा ११ जना कर्मचारी खटिने छन् ।

मतदानका लागि ७२ घण्टाभित्र कोरोना परीक्षण गरेको रिपोर्ट अनिवार्य देखाउनुपर्ने भएकाले हरेक जिल्लामा रहेको स्वास्थ्य कार्यालयले पिसिआर परीक्षण गर्ने जिम्मा पाएका थिए । सोहीअनुसार शुक्रबार दाङका जनप्रतिनिधि, निर्वाचन कार्यालयका कर्मचारी, सुरक्षाकर्मी र निर्वाचनमा खटिने सबै जनाको कोरोना परीक्षण सुरु गरिएको जिल्ला जनस्वास्थ कार्यालय दाङका प्रमुख अङ्गतबहादुर शाहीले जानकारी दिनुभयो । उहाँका अनुसार पिसिआर नमुना सङ्कलन गरेर राप्ती स्वास्थ्य विज्ञान प्रतिष्ठानमा पठाइसकिएको र त्यसको नतिजा आउन एकदुई दिन लाग्ने बताउनुभयो ।

उम्मेदवारको अन्तिम नामावली प्रकाशन गरिएको र चुनावचिह्नसमेत प्रदान गरिसकेकाले अब मतदान केन्द्रमा आवश्यक संरचना निर्माण गर्ने र आवश्यक कर्मचारीको छनोट हुने उहाँको भनाइ छ । निर्वाचनका लागि मुख्य निर्वाचन अधिकृतका रूपमा देउखुरी जिल्ला अदालतका न्यायाधीस रितेन्द्र थापा र सहायक मतदान अधिकृतमा निर्वाचन कार्यालयका निमित्त प्रमुख नीमराज भट्टराईलाई तोकिएको छ ।

उपनिर्वाचनमा जनता–समाजवादी पार्टीले कारबाही गरेका प्रदेशका मन्त्री सन्तोषकुमार पान्डे, कल्पना पान्डे, विजयबहादुर यादव र सुमन शर्मा रायमाझीले मतदान दिन पाउने छैनन् । ८७ जना सदस्य रहेको लुम्बिनीमा प्रदेशसभाले जसपाले कारबाही गरेका चार जना, माओवादी–केन्द्रले कारबाही गरेका दुई जना र एमालेबाट राजीनामा गरेका दुई जना गरी आठ जना सांसदको पद रिक्त भएको पत्र निर्वाचन आयोगलाई पठाएको छ ।

यही जेठ १७ गते हुने निर्वाचन आयोगले प्रकाशन गरेको अन्तिम मतदाता नामावलीमा प्रदेशसभा सदस्यबाट ७९ जनाको मात्रै नाम रहेको छ ।

सर्वोच्चले जेठ ३ गते उहाँहरूलाई कारबाही गर्ने निर्णय जेठ १६ सम्मका लागि कार्यान्वयन नगर्न अल्पकालीन आदेश दिएको थियो ।

लुम्बिनी प्रदेशमा रहेका १०९ स्थानीय तहमा नेकपा (एमाले) का ९१, नेपाली काङ्ग्रेसका ६४, नेकपा माओवादी (केन्द्र) ३९, जसपा १३, राष्ट्रिय जनमोर्चा ५, राप्रपा २ र स्वतन्त्र ४ जना रहेका छन् ।

प्रदेशसभा सदस्य ७९ र गाउँपालिका अध्यक्ष, उपाध्यक्ष तथा नगरपालिकाका प्रमुख, उपप्रमुख दुई सय १७ गरी जम्मा दुई सय ९६ जना मतदाता रहेका छन् ।

राष्ट्रियसभा सदस्य अर्घाखाँचीका चन्द्रबहादुर खड्का एमालेमा प्रवेश गरेपछि पार्टीले कारबाही गर्दा उक्त पद रिक्त भएको थियो । यसपाली नेकपा एमालेबाट तिनै चन्द्रबहादुर खड्का र गठबन्धनबाट दीर्घनारायण पान्डेलाई उम्मेदवार बनाइएको छ । गठबन्धनमा नेपाली काङ्ग्रेस, नेकपा (माओवादी–केन्द्र), राष्ट्रिय जनमोर्चा, जनता–समाजवादी पार्टी (उपेन्द्र समूह) को समर्थन छ । विपक्षी गठबन्धनका उम्मेदवार पाण्डे गत निर्वाचनमा एमालेको तर्फबाट लुम्बिनी प्रदेशसभा सदस्यमा निर्वाचित हुनुभएको थियो । प्रदेशसभा सचिवालयले निर्वाचन आयोगलमा पठाएको पत्रका आधारमा अन्तिम मतदाता नामावली प्रकाशन गरिएको प्रदेश निर्वाचन कार्यालयले जनाएको छ । (रासस)