शंकर प्रसाद पोख्रेल, गुल्मी ।
संसद विघटन तथा नागरिकतासम्बन्धी अध्यादेशविरुद्ध गुल्मीको सत्यवतीमा मसाल जुलुश प्रदर्शन गरिएको छ । राष्ट्रिय जनमोर्चा, सत्यवति गाउँपालिका २ नं वडा समितिको आयोजनामा सोमबार राति मसाल जुलुश प्रदर्शन गरिएको हो ।
त्यस क्रममा मसाल जुलुशमा सहभागी नेता कार्यकर्ताहरुले संसद पुनर्स्थापना गर्न तथा राष्ट्रघाती नागरिकता विधेयक खारेज गर्न माग गरेका थिए । कोरोना संक्रमणप्रति सावधान हुँदै सहभागीहरुले ‘राष्ट्रघाती नागरिकता अध्यादेश खारेज गर, संघीयता खारेज गर , प्रतिगामी कदम मुर्दावाद, बिघटित प्रतिनिधिसभा पुनर्स्थपना गर’ लगायत चर्का नारा लगाएका थिए ।
जुलुशपछि आयोजित कोण सभाको सञ्चालन राजमो सत्यवती–२ का सचिव प्रेम कुँवले गर्नुभएको थियो भने अध्यक्षता रोम बहादुर कुँवरको रहेको थियो । कार्यक्रममा मूल प्रवाह अखिल भारत नेपाली एकता समाजका नेता टंक कुंवर र नेकपा (मसाल) गुल्मी जिल्लाका प्रवक्ता ओमेन्द्र कुंवरले सम्बोधन गर्नुभएको थियो ।
सभालाई सम्बोधन गर्दै नेताहरुले प्रधानमन्त्री केपी ओलीको राजीनामा माग्नुभएको थियो । उहाँहरुले लोकतन्त्र र राष्ट्रियता रक्षाका लागि आन्दोलनमा उत्रन सबैसँग आव्हान गर्नुभएको थियो ।
