काठमाडौँ । प्रगतिशील लेखक सङ्घले १ नं. प्रदेशको साहित्यबारे चवालिसौँ परिसंवाद कार्यक्रम सम्पन्न गरेको छ ।
“प्रदेश नं. १ को साहित्य : विगत र वर्तमान” विषयमा प्रलेसका सचिवालय सदस्य डा. देवी दुलालले विषयवस्तु प्रस्तुत गर्दै २०७८ जेठ ७ गते भर्चुअल माध्यमबाट उक्त कार्यक्रम सम्पन्न भएको हो ।
कार्यक्रममा विषयवस्तु प्रस्तुत गर्दै डा. दुलालले धेरै पहिलेदेखि नै प्रदेश नम्बर १ मा साहित्य लेखिन थालेको बताउनुभयो । विराटनगर प्रदेश नम्बर १ को साहित्यिक गतिविधिको केन्द्र रहने गरेको बताउँदै उहाँले त्यसका साथै इलाम, भोजपुर, खोटाङजस्ता जिल्लामा पनि साहित्यिक गतिविधि यथावत रहेको बताउनुभयो ।
प्रदेश नम्बर १ मा महानन्द सापकोटाजस्ता प्रगतिशील साहित्यकार सक्रिय रहेको उल्लेख गर्दै उहाँले पछिल्लो समयमा निनु चापागाई, मातृका पोखरेल, रुद्र खरेलसहित धेरै केन्द्रीय स्तरका साहित्यकारले प्रगतिशील लेखक सङ्घको नेतृत्व नै गरेको स्मरण गर्नुभयो ।
प्रलेसको स्थापनापछि धरानका बिए कृष्ण श्रेष्ठले प्रदेश नं. १ मा प्रलेसका वैचारिक र साङ्गठनिक गतिविधि अघि बढाएको बताउँदै उहाँले अहिले प्रदेश नं. १ को सरदर तीन सयदेखि पाँच सय पृष्ठको इतिहास प्रकाशनको क्रममा रहेको जानकारी दिनुभयो ।
आख्यान, कविता, मुक्तक, गजल, अनुसन्धान, अनुवादसहितको सम्पूर्ण साहित्यमा प्रदेश नम्बर १ का स्रष्टाहरूको उल्लेखनीय भूमिका रहेकोसमेत उहाँले दावी गर्नुभयो ।
उहाँले १ नं. प्रदेशमा सत्ताको खबरदारी गर्दै अहिले पनि तीन सयभन्दा बढी सक्रिय साहित्यकारहरू सक्रिय रहेको बताउनुभयो ।
कार्यक्रममा प्रमुख अतिथि प्रलेसका अध्यक्ष प्रा.डा. जीवेन्द्र देव गिरीले यसरी प्रत्येक प्रदेशका साहित्यको बारेमा खोजीनीति गर्ने सिलसिलाले सिङ्गो प्रलेसको इतिहास तयार गर्ने काममा मद्दत पुग्ने विश्वास व्यक्त गर्नुभयो ।
कार्यक्रम उपाध्यक्ष तथा परिसंवाद उपसमितिका संयोजक गोपीरमण उपाध्यायको अध्यक्षता तथा महासचिव समीर सिंहको सञ्चालनमा अघि बढेको थियो ।
विषयवस्तुको प्रस्तुतिपछि ताराबहादुर बुढाथोकी, डा. कृष्णराज अधिकारी, पदम शर्मा, डम्मर पहाडी, प्राडा बद्रिविशाल पोखरेल र दुर्गा नेपालीले पूरक जिज्ञासा राख्नुभएको थियो ।
